Sjáðu alla dramatíkina í leik Liverpool og Tottenham frá öðru sjónarhorni

Það gekk mikið á í leik Liverpool og Tottenham í ensku úrvalsddeildinni sem fór fram á Anfield á sunnudaginn og nú býður Liverpool upp á það að fylgjast með gangi mála í þessum magnaða leik frá öðru sjónvarhorni.

Liverpool setti myndband inn á Youtube-síðu félagsins undir merkjunum Inside Anfield en þetta hefur verið í boði frá mörgum heimaleikjum liðsins á þessari leiktíð.

Leikurinn var frábær skemmtun og dramatíkin í lokin sprengdi næstum því alla mæla. Stuðningsmenn Liverpool fór á örskotsstundu úr því að fagna frábæru marki Mo Salah í það að missa sig úr reiði yfir dómurum leiksins.

Liverpool komst tvisvar yfir í leiknum en fékk síðan dæmdar á sig tvær vítaspyrnur á lokakaflanum. Seinni vítaspyrnan kom í uppbótartíma og úr henni tryggði Harry Kane Tottenham jafntefli.

Myndbandið er tekið úr göngunum á Anfield sem og úr myndavélum á sérstökum stöðum á vellinum. Í þessu myndbandi heyrast hljóðin frá áhorfendunum mjög vel og maður fær því alla stemmninguna beint í æð.

Liverpool og Tottenham eru að keppa um sæti í Meistaradeildinni á næsta tímabili og þessi leikur því gríðarlega mikilvægur fyrir bæði lið.

2-2 jafnteflið hjálpaði því ekki mikið en stig er samt stig. Liverpool er í 3. sæti með 51 stig og Tottanham er í 5. sæti með 49 stig. Chelsea hefur tapað tveimur leikjum í röð en meistararnir eru í 4. sæti með 50 stig.