Bílar

Volvo þarf að auka við framleiðslu Polestar 1

Finnur Thorlacius skrifar
Polestar 1 er með skandínavískar og naumhyggjulegar línur en aflrásin verður seint tengd við naumhyggju.
Polestar 1 er með skandínavískar og naumhyggjulegar línur en aflrásin verður seint tengd við naumhyggju.

Kraftabíladeild Volvo heitir Polestar og er tiltölulega nýstofnuð sem sjálfstæð eining, en margir bílaáhugamenn þekkja fyrri Volvo Polestar bíla sem margir hverjir hafa verið gríðarlegir orkuboltar. Fyrsti bíllinn sem eingöngu er ætlað að bera Polestar merkið mun bera hið einfalda heiti Polestar 1. Þar fer mjög öflugur tengiltvinnbíll sem mun kosta sitt.

Meiningin hjá Polestar var að framleiða fyrst 500 eintök af hálfgerðri viðhafnarútgáfu hans með 600 hestafla aflrás og að miklu leiti smíðaður úr koltrefjum. Svo margir hafa þó skráð sig fyrir þessum tilvonandi bíl, eða meira en 5.000 áhugasamir kaupendur, að Volvo er að hugsa um að auka við hina fyrirhuguðu takmörkuðu framleiðslu. 
Polestar verður framleiddur í nýrri verksmiðju Polerstar í Chengdu í Kína og á hún að verða tilbúin um mitt þetta ár. Polestar verður með stórar rafhlöður sem duga til 150 km aksturs án aðstoðar frá brunavél hans. Sú drægni gerir hann að langdrægasta tengiltvinnbíl sem sögur fara af, enn sem komið er.

Volvo mun byrja að taka við raunverulegum pöntunum í Polestar 1 bílinn stuttu eftir bílasýninguna í Genf í mars, en þar verður hann sýndur almenningi fyrsta sinni. Þá mun væntanlega koma í ljós hvort Polestar þurfi ekki hressilega að bæta við í framleiðslu þessa magnaða bíls.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.