Brotin eiga að hafa verið framin í húsnæði á vegum Barnaverndar

Brotin sem starfsmaður Barnaverndar Reykjavíkur er grunaður um eiga að hafa átt sér stað á stuðningsheimili á vegum borgarinnar þar sem önnur ungmenni dvöldu einnig. Framkvæmdastjóri barnaverndar segir málið grafalvarlegt. Þá viðurkennir lögreglan mistök í málinu.

Kæra var lögð fram á hendur manninum, sem er 43 ára gamall, í ágúst síðastliðnum fyrir að hafa frá 2004 til 2010 brotið gróflega gegn pilti sem þá var 8 til 14 ára og meðal annars byrlað honum svefnlyfi. Brotin eiga að hafa verið framin aðra hverja helgi þegar pilturinn var í umsjá mannsins.

Maðurinn var fenginn af foreldrum hans til að veita honum stuðning en hann hefur starfað með börnum fyrir Reykjavíkurborg í um 20 ár. Þá leikur grunur á að maðurinn hafi einnig brotið gegn tveimur systkinum piltsins.

Þrátt fyrir að kæra hafi verið lögð fram á hendur manninum í ágúst var hann ekki handtekinn fyrr en nú í janúar og hefur maðurinn því síðustu fimm mánuði áfram sótt starf sitt sem umsjónaraðili á vistheimili fyrir unglinga á vegum Reykjavíkurborgar. Athygli vekur að í kærunni stendur að kunnugt sé um að kærði hafi starfað fyrir barnaverndaryfirvöld og meðal annars rekið heimili fyrir börn.

Gerðu mistök

Árni Þór Sigmundsson, yfirmaður kynferðisbrotadeildar lögreglunnar, segir að ekki sé sérstaklega tiltekið í kærunni að hann starfi enn með börnum. Það hafi ekki komið í ljós fyrr en hafist var handa við að rannsaka brotið í janúar. Þá hafi meintur gerandi strax verið handtekinn og barnaverndaryfirvöld umsvifalaust verið látin vita.

„Allir sem að málinu komu töldu að það hefði verið átt við þá en ekki núna. Við áttuðum okkur ekki á því að hann væri núverandi starfsmaður,“ segir Árni Þór. 

Voru það mistök?

 „Það er yfirsjón, já,“ segir Árni Þór og bætir við að næstu daga verði unnið hörðum höndum að því að kanna hvað hafi farið úrskeiðis.

„Hér hefur verið gríðarlegur erill síðasta árið og þegar þannig ástand er þá aukast líkurnar á svona,“ segir Árni sem hefði gjarnan kosið að málið hefði farið öðruvísi og önnur vinnubrögð hefðu verið höfð í hávegum.

„Þá ekki síst að í upphafi hverrar rannsóknar sé leitast við að finna hvar viðkomandi starfar.“

Brotaþoli segist hafa látið lögreglu vita af starfi mannsins

Nú hefur komið í ljós að kæra piltsins frá því í ágúst síðastliðnum er ekki sú fyrsta sem lögð hefur verið fram á hendur manninum. Hann var einnig kærður til lögreglu árið 2013 fyrir kynferðisbrot gegn barni.

Samkvæmt þeirri kæru eiga þau brot að hafa átt sér stað á tímabilinu 2000 til 2006 gegn pilti tengdur manninum fjölskylduböndum.

Árni Þór segir að brotin hafi verið fyrnd og málið því látið falla niður. Í gögnum málsins sé hvergi að finna upplýsingar um að maðurinn hafi starfað með börnum.

Brotaþoli í málinu, sem nú er fullorðin, fullyrðir aftur á móti í samtali við fréttastofu að hann hafi sagt frá því við skýrslutöku að maðurinn ynni með börnum.

Það kemur svo önnur kæra 2017 hefði ekki verið eðlilegt að það hringi viðvörunarbjöllur?  

„Jú það er rétt. Þetta verður skoðað og já það er bara þannig,“ segir Árni Þór.

Enn sem komið er er maðurinn ekki grunaður um brot gegn þeim börnum sem honum hefur verið trúað fyrir starfa sinna vegna. Hins vegar eiga brotin á bak við kærurnar tvær að hafa átt sér stað á stuðningsheimili á vegum borgarinnar þar sem önnur ungmenni dvöldu ásamt manninum.

Brotin sögð hafa átt sér stað á sambýli borgarinnar

„Þar bjó tilsjónaraðilinn með tveimur til þremur börnum í íbúð og var þeim til stuðnings í daglegu lífi. Mér skilst að kæran sé þannig að hann hafi átt að taka þetta barn inn á þetta tilsjónarsambýli sem hann starfaði á á þessum tíma og að brotin hafi átt aðeiga sér stað á þessu heimili,“ segir Halldóra Dröfn Gunnarsdóttir, framkvæmdastjóri Barnaverndar Reykjavíkjavíkur.

Hún segir að í ljósi þessa sé málið enn alvarlegra.

„Að starfsmaður sem er í þessu hlutverki gagnvart ungmennum sé grunaður um að taka átta ára gamalt barn inn á heimilið og brjóta gegn því.“