Bílar

1.400 bílar brunnu í bílastæðahúsi í Liverpool

Finnur Thorlacius skrifar
Allir bílar sem í bílastæðahúsinu voru brunnu til kaldra kola.
Allir bílar sem í bílastæðahúsinu voru brunnu til kaldra kola. Jalopnik

Á gamlársdag fuðruðu 1.400 bílar upp í miklu eldhafi í 7 hæða bílastæðahúsi í Liverpool í Englandi. Talið er að eldurinn hafi breiðst út frá Land Rover bíl og að í honum hafi kviknað eftir að eigandi hans yfirgaf bílinn. Enginn meiddist í þessum mikla bruna en slökkviliðsmönnum reyndist afar örðugt að slökkva þetta mikla eldhaf.

Mikill hiti myndaðist í bílastæðahúsinu og hætta er talin á því að húsið geti hrunið, þó svo það standi enn. Bílastæðahúsið stendur nærri Liverpool International Horse show og voru margir eigendur þessara fjölmörgu bíla sem brunnu að horfa á hestasýningu þegar eldhafið blossaði upp. Slökkviliðið í Liverpool þurfti aðstoð frá kollegum sínum í Manchester til að ráða niðurlögum eldsins.

Íbúum í nærliggjandi húsum var gert að yfirgefa hús sín og var sett upp fjöldahjálparstöð til að hýsa þá. Gríðarlegt tjón varð af þessum mikla bruna og ef gert er ráð fyrir að hver bíll sem þarna brann hafi verið að andvirði 3 milljóna að meðaltali, er eingöngu bílatjónið 4,2 milljarðar króna.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira