Bílar

Volvo reisir Polestar verksmiðju í Kína

Finnur Thorlacius skrifar
Polestar 1 verður mikill orkubolti og alls 600 hestöfl.
Polestar 1 verður mikill orkubolti og alls 600 hestöfl. Volvo

Kraftabíladeild Volvo, sem fengið hefur heitið Polestar mun einnig fá eigin verksmiðju og er smíði hennar hafin í Chengdu í Kína. Þar fjárfestir Volvo, eða öllu heldur eigandi Volvo, Geely fyrir 78 milljarða króna. Verksmiðjan á að verða tilbúin um miðbik næsta árs, en ekki er þó stefnt að útkomu fyrsta bílsins sem þar verður smíðaður, Polestar 1, fyrr en árið 2019.

Þessi nýja verksmiðja verður að sögn Volvo manna umhverfisvænasta bílaverksmiðja í Kína, en í leiðinni sú skilvirkasta. Volvo ætlar að kynna næsta bíl Polestar, þ.e. Polestar 2 einnig á árinu 2019 og verður hann á stærð við Tesla Model 3 bílinn. Heyrst hefur síðan af þróunarvinnu Polestar 3, sem verður jeppi á stærð við Tesla Model X.

Polestar 1 á að verða 600 hestafla orkubolti í formi tengiltvinnbíls. Hann verður með ógnarlegt tog uppá 1.000 Nm og fjórhjóladrif þar sem rafmótorar drífa afturhjólin og 2,0 lítra bensínvél framhjólin. Polestar 1 á að geta farið fyrstu 150 kílómetrana á rafmagni eingöngu, en á EV-stillingu er hann eingöngu afturhjóladrifinn. Polestar 1 mun þó kosta skildinginn því heyrst hefur að verðmiðinn á honum verði 177.000 dollarar, eða um 18 milljónir króna.

Innanrými Polestar1 verður kunnglegt frá nýrri Volvo bílum.


Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira