Innlent

Tveir legsteinar bjóðast á ómerkta gröf Vigdísar

Garðar Örn Úlfarsson skrifar
Vigdís Ingvadóttir hvílir í gröf númer 148 við innganginn að Skeiðflatarkirkju.
Vigdís Ingvadóttir hvílir í gröf númer 148 við innganginn að Skeiðflatarkirkju. Mynd/Guðmundur B. Guðbergsson

„Ég lýsi yfir mikilli ánægju og þakklæti til fólks sem tekur undir þetta með okkur,“ segir Jóna Sigríður Jónsdóttir, forystukona um uppsetningu legsteins á leiði flökkukonunnar Vigdísar Ingvadóttur í Mýrdal.

Frétt Fréttablaðsins í gær um erfitt lífshlaup Vigdísar og söfnun Jónu og annarra kvenna úr Mýrdal fyrir legsteini á ómerkta gröf Vigdísar í Skeiðflatarkirkjugarði vakti mikla athygli. Tvö fyrirtæki höfðu í gær samband við Fréttablaðið og síðar Jónu til að bjóða fram legstein á leiði Viggu gömlu. Fjöldi fólks lýsti vilja sínum til að leggja söfnuninni lið.

„Við hjónin vorum að tala um að það væri gaman að styrkja þetta verkefni, þetta er flott framtak,“ segir Birnir Vignisson, eigandi Steinsmiðju Akureyrar, sem vill gefa legstein svo söfnunarféð sjálft geti nýst í að koma steininum fyrir.

Vigdís Ingvadóttir í túlkun Jónu Sigríðar Jónsdóttur.

„Þetta fannst okkur það falleg og skemmtileg frétt að okkur langar að gefa þeim legstein fyrir Vigdísi, það væri gaman ef við gætum aðstoðað þær ef þær vildu,“ segir Bergur Steingrímsson hjá Graníthöllinni sem kveðst eiga von á Vigdísarhópnum í heimsókn í næstu viku.

„Ég átti ekki von á neinu í þessa veru en er að verða nokkuð bjartsýn,“ segir Jóna. Hún hafði áður rætt málið við sóknarnefnd Skeiðflatarsóknar. „Hún tók vel í að aðstoða okkur við að setja steininn upp.“

Vigdís flúði tíu ára gömul undan harðræði á æskuheimili sínu og lagðist í flakk sem stóð meira og minna þar til hún lést 92 ára gömul 5. janúar 1957. Sveitarstjórn Mýrdalshrepps hafði þegar ákveðið að styrkja söfnunina um 50 þúsund krónur og Jóna segir Hótel Dyrhólaey einnig áður hafa lofað myndarlegum fjárstuðningi.

Jóna Sigríður Jónsdóttir.

Skírnir Garðarsson, sem er starfandi sóknarprestur í Vík í Mýrdal í afleysingum fram á næsta sumar, segir Vigdísi vera sér einkar hugleikna af tveimur ástæðum. Hann hafi rætt við sóknarnefnd og heimamenn um að koma legsteini á leiði gömlu flökkukonunnar.

„Hún var fórnarlamb eineltis sem barn og unglingur og einnig sem fullorðin og er í raun samnefnari þeirra mörgu sem slíkt hafa orðið að þola. Svo er hún afkomandi eldklerksins séra Jóns Steingrímssonar sem var langafi hennar og sem ber höfuð og herðar yfir allt mögulegt hér eystra; hann var bæði prestur, náttúrufræðingur og leiðtogi Skaftfellinga um margra ára skeið,“ segir Skírnir.

Vigdís Ingvadóttir.

Fyrir þá sem vilja heimsækja leiði Viggu gömlu má geta þess að Skeiðflatarkirkja er rétt norðan við þjóðveg eitt á móts við afleggjarann að Dyrhólaey. Sólveig Guðmundsdóttir sem býr á bænum Litla-Hvammi, rétt við kirkjuna, kynntist ásamt systkinum sínum Viggu gömlu þegar hún gisti stundum á æskuheimili Sólveigar á Eystri-Skógum undir Eyjafjöllum. Það sé ágætt að Vigdís fái sinn legstein.

„Hún var náttúrlega sérstök. Hún fór á milli bæja og gisti, hún var ágæt,“ segir Sólveig um Viggu gömlu.


Tengdar fréttir

Flökkukonan Vigdís fær legstein sextíu árum eftir andlátið

Vigdís Ingvadóttir sem mætti harðræði föður síns og var höfð útundan í stórum systkinahópi í Mýrdal áður en hún lagðist í flakk aðeins tíu ára gömul fær loks legstein á leiði sitt sextíu árum eftir að hún dó í hárri elli.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.