Innlent

Beittu piparúða eftir að maður reyndi að flýja undan lögreglu á Hverfisgötu

Atli Ísleifsson skrifar
Atvikið átti sér stað á Hverfisgötu skammt frá gatnamótum við Snorrabraut.
Atvikið átti sér stað á Hverfisgötu skammt frá gatnamótum við Snorrabraut. Já.is

Lögregla á höfuðborgarsvæðinu og sérsveit ríkislögreglustjóra braut rúður í bíl á Hverfisgötu í morgun og sprautuðu piparúða inn eftir að ökumaður hafði reynt að aka á brott og ók við það utan í tvo lögreglubíla.

Í dagbók lögreglu segir að klukkan 6:29 í morgun hafi verið tilkynnt um sofandi par í bíl á Hverfisgötu skammt frá gatnamótum við Snorrabraut. Þegar lögreglumenn og sérsveitin komu á vettvang var ökumaður vakinn og þá hafi hann reynt að aka á brott og við það ekið á tvo lögreglubíla.

Hafi lögreglumenn á vettvangi þá átt fótum sínum fjör að launa. „Lögreglumenn brutu þá báðar hliðarrúður bifreiðarinnar að framan og sprautuðu piparúða inn í bifreiðina. Ökumaður og farþegi voru yfirbuguð og voru þau vistuð í fangageymslu og verða yfirheyrð síðar í dag vegna málsins,“ segir í dagbók lögreglu.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira