Veggjöld og kostnaður af umferðarslysum rædd á Samgönguþingi

Kostnaður samfélagsins sem hlaust af umferðarslysum á helstu stofnæðum út frá höfuðborgarsvæðinu var tæpir 16 milljarðar á árunum 2012 til 2016.

Á leiðinni milli Reykjavíkur og Selfoss nam áætlaður kostnaður vegna slysa á sama tímabili rúmlega sex milljörðum króna. Á leiðinni milli Reykjavíkur og Leifsstöðvar var kostnaðurinn áætlaður fimm og hálfur milljarður og umferðarslys á milli Reykjavíkur og Borgarness kostuðu rúmlega fjóra milljarða.

Tölurnar byggja á gögnum úr slysaskrá Samgöngustofu og voru teknar saman fyrir starfshóp um fjármögnun framkvæmda við helstu stofnleiðir til og frá höfuðborgarsvæðinu. Starfshópurinn kynnir skýrslu sína og helstu tillögur á Samgönguþingi í dag.

„Þessar tölur byggja á aðferðafræði sem áætlar kostnað samfélagsins frekar varlega,“ segir Eyjólfur Árni Rafnsson, formaður starfshópsins, en lætur þess getið að hægt sé að velja fleiri en eina leið til að meta þennan kostnað en skiptar skoðanir séu um aðferðafræðina.

Tölurnar ná yfir kostnað vegna starfa lögreglu, slökkviliðs og sjúkraflutningamanna og kostnað vegna eignatjóns, sjúkrahúskostnað, vinnutap og þess háttar. Tölurnar ná hins vegar ekki yfir óáþreifanlegt tjón vegna tapaðrar verðmætasköpunar sem einstaklingur hefði stuðlað að, hefði hann verið við fulla heilsu út líftímann.

Aðspurður um áhugann á þessum tölum segir Eyjólfur að með þeim megi áætla hvað umbætur á þessum stofnæðum gætu verið lengi að borga sig upp. „Ef við gætum helmingað þessa slysatíðni með betri vegum gætu framkvæmdirnar borgað sig upp á þrjátíu árum út frá þessum þætti einum og sér,“ segir Eyjólfur.

Starfshópurinn kynnir niðurstöður sínar á Samgönguþingi í dag en þær fela í sér tillögur um framkvæmdir á þessum helstu stofn­æðum. Áætluð heildarfjárfesting er 56 milljarðar með virðisaukaskatti og mun starfshópurinn leggja til að veggjöld verði innheimt í einhverjum tilvikum.

„Við erum að leggja til framkvæmdir sem við teljum raunhæft að ljúka á átta árum og setjum fram mat á því af hvaða stærðargráðu þetta gæti verið og hugmyndir að raunhæfri gjaldtöku.“

Aðspurður segir Eyjólfur Sundabraut ekki hafa verið til umræðu í þessari vinnu, þar sé of margt óunnið.