Sló fjölmörg heimsmet á siglingu um Norður-Íshafið

Andlegur styrkur og hugarró skiptir mestu máli í róðri við erfiðar aðstæður. Þetta segir Íslendingur sem stýrði Polar Row leiðangrinum í Norður-Íshafi í sumar, og sló fjölmörg heimsmet í leiðinni. 

Ferðalagið hófst í Tromsö í Noregi, þaðan sem siglt var norður að Longyearbyen á Svalbarða. Þar tók við ný áhöfn undir stjórn Fianns sem sigldi enn lengra, allt að íshellu Norður-Íshafsins, áður en snúið var aftur suður og endað á Jan Mayen. Upprunalega stóð til að hópurinn myndi enda á Íslandi, en hverfa þurfti frá þeirri áætlun eftir að veður setti strik í reikninginn og hluti áhafnarinnar fékkst ekki til að halda lengra.

Sjá einnig: Íslendingur í háskaför

Fiann bæði setti þó og sló fjölmörg heimsmet í ferð sinni, en hann á nú hraðametin í róðri yfir Atlantshaf, Kyrrahaf, Indlandshaf og nú Norður-Íshafið. Á sama tíma varð hann fyrsti maður heims sem vitað er að hafi róið yfir höfin fjögur. Enn fremur hélt hópurinn á norðlægustu breiddargráðu sem róið hefur verið á, svo vitað sé.

Fjallað var um málið í fréttum Stöðvar 2 í kvöld og má sjá fréttina á mínútu 20:50 í fréttatímanum hér fyrir neðan.