Jóhann bestur í ágúst og Andri Rúnar skoraði besta markið

Jóhann Laxdal var kjörinn besti leikmaður Pepsi-deildar karla af lesendum Vísis en niðurstöðurnar voru kynntar í Pepsi-mörkunum á Stöð 2 Sport á sunnudag.

Jóhann var lykilmaður í vörn Stjörnunnar sem fékk á sig aðeins tvö mörk allan síðasta mánuðinn. Jóhann byrjaði alla leiki og skoraði eitt mark í 4-0 sigri á Fjölni.

Þá var einnig kosið um besta markið og varð mark Andra Rúnars Bjarnasonar gegn KR fyrir valinu en það má sjá í spilaranum hér fyrir neðan.