„Músin kom í salatið af völdum manna sem vilja okkur eitthvað illt“

Einar Ásgeirsson, einn eigenda og stjórnarformaður Fresco, segi algjörlega útilokað að músarungi sem karlmaður um þrítugt segist hafa fundið í salati sem hann keypti hjá Fresco, hafi verið í salatinu þegar maðurinn yfirgaf staðinn. 

Frétt Morgunblaðsins af málinu í morgun hefur vakið mikla athygli en veitingastaðurinn sem lá undir grun var ekki nafngreindur. Í framhaldinu sór veitingastaðurinn Local, sem sérhæfir sig í salötum, af sér öll tengsl við málið.

Óhætt er að segja að Einari hjá Fresco hafi verið mikið niðri fyrir þegar blaðaðmaður náði af honum tali í hádeginu. 

„Það kemur einhver strákur, kaupir hjá okkur salat og tekur það með sér. Síðan kemur þetta í ljós,“ segir Einar og er ekki skemmt. Hann hefur verið í veitingabransanum í á fjórða áratug en hann á Fresco og rekur ásamt sonum sínum tveimur.

„Okkur er tjáð að strákurinn hafi farið með salatið á vinnustaðinn sinn og þar kemur þetta í ljós.“

Ekkert nagdýravandamál

Einar segir þá ítrekað hafa reynt að ná í manninn, sem er samkvæmt upplýsingum Einars um þrítugt, síðan á sunnudag en án árangurs. Aftur á móti hafi móðir hans hringt í Fresco og hellt úr skálum reiði sinnar. Engin leið hafi verið að ræða við hana sem fullyrti að sonurinn hefði þurft að leita á bráðamóttöku vegna músarinnar.

„Við könnuðum það og þar kannaðist enginn við málið.“

Lögreglunni var tilkynnt um málið á sunnudaginn sem gerði Heilbrigðiseftirliti Reykjavíkur viðvart. Eftirlitið mætti á Fresco á Suðurlandsbraut samdægurs. Einar segir hafa verið sjálfsagt mál að aðstoða eftirlitið. Staðnum hafi verið lokað um tíma á meðan öllu salati var fargað en músin átti að hafa fundist í spínatsalati.

„Heilbrigðiseftirlitið tók út staðinn en fann ekkert athugavert. Hér var allt til fyrirmyndar,“ segir Einar.

Einar segir þá feðga hafa leitað til birgja Fresco hvað spínatið varði, Inness, og það verið athugað hvort möguleiki væri á að músarunginn hefði komið erlendis frá. Það hafi verið talið útilokað. Krufning á músinni stendur yfir til að komast að því hvort hún sé innlend eða erlend.

Einar hefur marga fjöruna sopið í veitingageiranum frá 1985 þegar hann hóf rekstur.

Aleigan í veitingastöðunum

„Ég hef verið með marga veitingastaði og var mikið í pizzunum í gamla daga, seldi um 400 þúsund pizzur á ári. Maður er ýmsu vanur,“ segir Einar. Þannig hafi til dæmis komið upp að pizzukaupendur hafi reynt að troða alls kyns drasli undir ostinn til að reyna að kría út fría pizzu.

„Þetta getur ekki gerst á neinum veitingastað. Allavega aldrei hjá okkur. Það er ekki fræðilegur möguleiki.“

Hann segir að auðvitað sé fræðilegur möguleiki að bjalla, fluga eða annað pínulítið komist í salat. En músarungi? Ekki fræðilegur.

„Salat er þvegið, fer í klakabað, er umpakkað mörgum sinnum,“ segir Einar og leggur mikla áherslu á allt ferlið til að koma í veg fyrir að meira segja minnstu skordýr geti sloppið í gegn. 

„Við erum alveg brjálaðir feðgarnir. Aleiga strákanna minna liggur í þessum stöðum og það á að taka okkur af lífi fyrir eitthvað sem við eigum ekki skilið.“

Hann segir þá vera að skoða rétt sinn og leita ráða, hvort ekki þurfi að fara fram lögreglurannsókn á málinu.

„Hvað var í gangi? Við verðum að komast til botns í þessu svo við lendum ekki í þessu aftur,“ segir Einar.

„Músin kom í salatið af völdum manna sem vilja okkur eitthvað illt.“

Spínatið innkallað í varúðarskyni

Óskar Ísfeld Sigurðsson hjá Heilbrigðiseftirliti Reykjavíkur segir í samtali við Vísi að bráðabrigðaniðurstöður bendi til þess að um húsamús sé að ræða. Unnið sé eftir þeirri tilgátu að hún gæti hafa borist til landsins í spínatpokum og hafi bæði veitingahúsaeigendurnir og innflytjendurnir verið hjálplegir við þá rannsókn.

Inness hefur innkallað allt spínat sem kom til landsins í sömu sendingu og spínatið sem fór til Fresco. Óskar leggur áherslu á að eftirlitið sé að vinna í náinni samvinnu við fyrirtækin út frá fyrrnefndri tilgátu. Fyrirtækin hafi tekið góðan þátt í því.

Í fyrstu hafi verið velt fyrir sér hvort músin hefði getað verið í rómansalati. Það sé hins vegar skorið svo smátt að það sé útilokað því þá hefði sést á músinni. Því sé nú unnið með tilgátuna að músin hafi verið í spínatinu.

Hann minnir á að við allt matvælaeftirlit sé lögð áhersla á að allt salat sé þvegið því búasti megi við því að svona matvælum fylgi sandur, mold og steinar. Dæmi séu um að nagdýrshlutar eða nagdýr hafi fundist.