Rækta listaspírur með aðstoð geisladiska

„Við erum komnar með um 500 geisladiska en samkvæmt okkar útreikningum þurfum við 2.222 og jafnvel fleiri,“ segir Jóhanna Ásgeirsdóttir en hún ásamt þeim Vigdísi Bergsdóttur og Ágústu Gunnarsdóttur ætlar að reisa gróðurhús úr rusli, notuðum viði og gömlum geisladiskum.

Stelpurnar þurfa að gera geisladiskana glæra og því henta gamlir diskar og skrifanlegir geisladiskar einkar vel í verkefnið. Það geta nefnilega ekki allir diskar orðið gróðurhúsadiskar. Verkefnið er hluti af skapandi sumarstörfum í Kópavogi þar sem ungu fólki býðst að vinna að eigin verkefnum.

Jóhanna og Ágústa eru nýútskrifaðar með BA úr myndlist og Vigdís er að ljúka BSc í verkfræði. Vigdís fékk hugmyndina að gróðurhúsinu þegar hún tók þátt í námsstefnu í University of Oregon í Bandaríkjunum.

„Ég var á námsstefnu um leiðtogahæfni á sviði umhverfismála og þar fæddist þessi hugmynd. Oregon er framarlega í umhverfismálum og þar er mikið um kreatíva nálgun að lausnum. Svo fór ég að skoða gróðurhúsaplast og hvar væri hægt að finna það í hversdagslegum munum og það reyndist vera í geisladiskum. Það er ekki sama plast í venjulegum plastflöskum til dæmis,“ segir Vigdís.

Grindin verður úr notuðum viði sem stelpurnar eru búnar að safna af byggingarsvæðum. Húsið verður kúluhús og verður um 12 fermetrar. „Það sem okkur hefur fundist merkilegast er hvað fólk er að henda hlutum sem er allt í lagi með. Það er tímafrekt og kostnaðarsamt að henda hlutum og í raun engin ástæða til þess,“ segir Ágústa og bætir við að draumurinn sé að halda matarboð þar sem þær munu bjóða upp á það sem kemur upp úr moldinni.

„Fyrsta plantan fer ofan í núna 17. júní og þá ætlum við að vera með smá sýnishorn af því sem við ætlum að gera. Við erum komnar með tómataplöntur, kryddjurtir, piparblóm og kartöflur. Ef einhver vill koma og gróðursetja hjá okkur má það. Þetta verður líka samverustaður þar sem verður vonandi góð stemning,“ segir Jóhanna.