Bakþankar
Pálmar Ragnarsson

Dulbúið sælgæti

Pálmar Ragnarsson skrifar

„Varúð, þessi vara inniheldur mikið magn af viðbættum sykri.“

Í kælum allra matvöruverslana landsins má finna mikið úrval af sælgæti dulbúnu sem matvöru. Það getur verið erfitt að átta sig á því hvað er hvað, flest er þetta hlið við hlið í keimlíkum umbúðum. Hér að ofan er því texti sem ætti að standa í stórum og áberandi stöfum framan á umbúðum þessara vara.

Í smáa letrinu gæti síðan staðið: „Í þessari vöru er óhóflega mikið magn af viðbættum sykri. Mikil neysla á þessari vöru eykur líkurnar á offitu, hjartasjúkdómum, sykursýki og fleiri lífsstílssjúkdómum. Þessi vara er ekki ætluð börnum.“

Mér þykir það annars áhugavert. Af hverju er mynd af hoppandi barni framan á vöru ef hún er ekki ætluð börnum? Eða eru þessar vörur kannski ætlaðar börnum? Það þætti mér skrýtið miðað við það sem við vitum í dag.

Ef dulbúnu sælgætisframleiðendurna langar að vera alveg hreinskilnir gætu þeir jafnvel bætt við enn meiri texta á umbúðirnar: „Mikið magn viðbætts sykurs hefur engin jákvæð áhrif á líkama eða líf fólks til lengri tíma. Eina ástæða þess að við setjum næstum jafn mikinn sykur í þessa vöru og í gosdrykki er til að hún seljist betur.“

En kannski er ég að misskilja. Kannski er varan bara sykruð svona mikið til að gleðja fólk en ekki til að selja meira. Það gleður nú börnin ansi mikið að fá daglega „mat“ sem er jafn bragðgóður og bragðarefur. Þar til þau fá sykursýki seinna meir, úps.
Hvað fæ ég annars mikið pláss til að skrifa á umbúðirnar? Meira? Frábært:

„Við biðjum ykkur fyrirfram afsökunar á þeim áhrifum sem þessi matvara mun hafa á líkama og líf ykkar og barnanna ykkar.“
Það er nóg af sykri í sælgæti og gosdrykkjum. Við þurfum ekki á því að halda að honum sé troðið í matvörurnar líka.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Skoðun

Bakþankar

Ekki ein

María Bjarnadóttir skrifar

Bakþankar

Gula RÚV

Sirrý Hallgrímsdóttir skrifar

Bakþankar

Daður

Þórarinn Þórarinsson skrifar

Sjá meira