Lífið

Fagna 20 árum af sviðsetningu víkingabardaga

Sæunn Gísladóttir skrifar
Meðal þess sem Rimmugýgur gerir er að sviðsetja víkingabardaga og almennt víkingatíma.
Meðal þess sem Rimmugýgur gerir er að sviðsetja víkingabardaga og almennt víkingatíma. Vísir/Valli

Víkingafélagið Rimmugýgur fagnaði á dögunum þeim áfanga að tuttugu ár voru liðin frá því að félagið var formlega stofnað við Öxarárfoss á Þingvöllum þann 7. júní 1997.

Rimmugýgur er félag áhugamanna um menningu og bardagalist víkinga. Tilgangur félagsins er að stuðla að auknum áhuga á víkingatímabilinu og uppruna þjóðarinnar.

„Við byrjuðum í raun árið 1996, það var Víkingahátíð Hafnarfjarðar árið 1995 sem kveikti áhugann hjá okkur. Við byrjuðum 1996 og tókum þátt í okkar fyrstu hátíð árið 1997 og þá stofnuðum við þetta félag formlega,“ segir Hafsteinn Kúld Pétursson, formaður félagsins.

„Það eru um 200 manns sem hafa komið að þessu félagi, virkir félagar núna eru milli 110 og 120. Það eru fleiri svona félög á ferli, en við erum elsta og trúlega stærsta félagið,“ segir Hafsteinn.

Félagið sviðsetur víkingatíma. „Við gerum það með handverki og bardögum og því sem til fellur. Við erum með útbúinn fatnað sem á að endurspegla þennan tíma,“ segir Hafsteinn.

„Við störfum allt árið. Til að geta sviðsett bardaga án þess að drepa einhvern í alvöru þá þurfum við að æfa og við æfum tvisvar í viku allt árið. Þetta er ágætis íþrótt til að halda sér í formi,“ segir Hafsteinn.

Æft er í bílakjallaranum undir verslunarmiðstöðinni Firði. En bogmenn æfa svo einu sinni í viku í Bogfimi­setrinu. Þeir sem fást við handverk hafa svo aðstöðu til þess. „Það er hellings umstang í kringum þetta og mikið líf í þessu félagi,“ segir Hafsteinn.

Stefnt er að því að halda upp á afmæli félagsins þann 8. til 13. ágúst á Víðistaðatúni og hefur félagið óskað eftir aðstoð Hafnarfjarðarbæjar vegna þessa.

Í erindi til bæjarins segir að félagið vilji halda veglega afmælishátíð og bjóða fólki frá öðrum víkingafélögum á Íslandi og erlendum vinum að fagna með sér. Félagið hyggst hafa opið almenningi um helgina 11. til 13. ágúst án endurgjalds. Félagið fer meðal annars fram á leyfi til að vera á Víðistaða­túni, grafa eldgryfjur og kveikja elda. Bæjarráð hefur tekið jákvætt í erindið og felur bæjarstjóra að vinna að málinu. 



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira