Lífið

Þrjár tegundir fíkniefna fundust í blóði Carrie Fisher

Hulda Hólmkelsdóttir skrifar
Carrie Fisher öðlaðist heimsfrægð sem Lilja prinsessa í Stjörnustríði.
Carrie Fisher öðlaðist heimsfrægð sem Lilja prinsessa í Stjörnustríði. Vísir/EPA

Þrjár tegundir fíkniefna fundust í blóði leikkonunnar Carrie Fisher við krufningu eftir andlát hennar í desember síðastliðnum. Um var að ræða efnin kókaín, heróín og MDMA.

Ekki er vitað hvenær Fisher hefur innbyrt efnin. Samkvæmt frétt á vef BBC gætu allt að þrír dagar hafa liðið frá því að hún tók efnin og þangað til hún fékk hjartaáfall um borð í flugvél þann 23. desember árið 2016 sem leiddi til dauða hennar fjórum dögum seinna.

Þá er ekki vitað hvort fíkniefnin hafi haft bein áhrif á dauða leikkonunnar ástsælu. Dánardómstjóri í Los Angeles sagði um helgina að hún hafi látist af völdum kæfisvefns og annarra þátta. Í fyrstu var sagt að banamein hennar hafi verið hjartaáfall. Dánardómstjóri hefur hins vegar sagt að nákvæm dánarorsök sé óþekkt.

Fisher var einna frægust fyrir að túlka persónu Lilju prinsessu í Stjörnustríðsmyndunum. Hún verður meðal annars í áttundu myndinni í sagnabálkinum sem frumsýnd verður í desember.


Tengdar fréttir

Carrie Fisher á gjörgæslu eftir hjartaáfallið

Leikkonan Carrie Fisher, sem er þekktust fyrir að hafa farið með hlutverk prinsessunnar Leiu í Stjörnustríðsmyndunum, er á gjörgæslu eftir að hafa fengið alvarlegt hjartaáfall þegar hún var á leið til Los Angeles með flugi frá London í gær.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira