Innlent

Gjaldtaka hafin í Raufarhólshelli

Kolbeinn Tumi Daðason skrifar
Eiríkur Ingvarsson hefur unnið að verkefninu fyrir hönd Kirkju sjöunda dags aðventista sem eiga jörðina sem Raufarhólshellir stendur á.
Eiríkur Ingvarsson hefur unnið að verkefninu fyrir hönd Kirkju sjöunda dags aðventista sem eiga jörðina sem Raufarhólshellir stendur á. Vísir/Vilhelm

Opnað var fyrir gesti í Raufarhólshelli, í Leitarhrauni austan Bláfjalla í Þrengslunum, í dag og kostar 4900 krónur að skoða hellinn í sumar. Hellirinn hefur verið lokaður frá því um áramót en síðan hafa staðið yfir framkvæmdir í hellinum. Pöllum hefur verið komið upp, stígar hlaðnir og ljósabúnaði komið fyrir.

Landið er í eigu Kirkju sjöunda dags aðventista en fyrirtækið Raufarhóll tók landið á leigu frá og með 1. júní í fyrra. Meðal fjárfesta í Raufarhóli er Skúli Gunnar Sigfússon, kenndur við Subway en stærsti fjárfestirinn er Icelandic Tourism Fund, fjárfestingasjóður á vegum Landsbréfa.

Úr Raufarhólshelli í gær. Vísir/Vilhelm

Eiríkur Ingvarsson, sem á sæti í framkvæmdastjórn Raufarhóls, segist hafa unnið að verkefninu í tvö ár fyrir hönd landeigandans. Hann segir að opnað hafi verið fyrir bókanir í ársbyrjun og fyrstu gestirnir mættu í morgun. Unnið hefur verið að frágangi fram á síðustu mínútu.

„Það er þessi íslenski stíll. Þegar síðustu iðnaðarmennirnir fara þá koma fyrstu gestirnir,“ segir Eiríkur. Hann segir útlitið gott fyrir sumarið miðað við bókanir það sem af er. Opið verður alla daga vikunnar en um klukkustundarheimsókn er að ræða. Sú fyrsta klukkan tíu á morgnana og sú síðasta fimm síðdegis.

Sjá einnig: Raufarhólshellir greiðfær til að sýna ferðamönnum

Almennt verð í heimsókn í Raufarhólshelli verður 6400 krónur frá og með haustinu. 

4900 krónur kostar að skoða hellinn í sumar en almennt verð er 6400 krónur. Vísir/Vilhelm

„Verðið ákvarðast af því að þarna er stöðug vakt af fólki sem hefur fengið öryggis- og jarðfræðiþjálfun. Svo er þetta náttúrulega gríðarleg fjárfesting,“ segir Eiríkur. Fjórir starfsmenn standi vaktina í hellinum á hverjum degi.

Samstarf landeigenda við fjárfesta hefur gengið ótrúlega vel að sögn Eiríks og leggur hann áherslu á að um umhverfisverndarverkefni sé að ræða.

„Allt það sem er gert þarna inni var gert með því hugarfari að það er hægt að taka þetta niður, skrúfa og bera út og hellirinn er í nákvæmlega sama ástandi og hann var fyrir. Þetta er gott verkefni og fyrst og fremst er þetta verndunarverkefni,“ segir Eiríkur. Sorglegt sé að horfa á staði eins og Gullfoss og Geysi vera troðna niður.

Ljósabúnaður lýsir upp hellinn. Vísir/Vilhelm

„Þarna erum við búnir að stoppa að átroðningurinn breiði út frá sér. Það er búið að fjarlægja fleiri tonn af sorpi úr hellinum þar með talinn klósettpappír í stöflum. Núna verður komið upp almenningssalernum svo ferðamenn geta komið þarna inn og gert sín stykki þar en ekki einhvers staðar annars staðar. Það er búið að gera ótrúlega mikið út frá náttúruverndarsjónarmiðum.“

Sjá einnig: Ómetanlegir hraunhellar þegar verið stórskemmdir

Raufarhólshellir er á náttúruminjaskrá og eins og Kerið þar sem gjaldtaka hefur verið undanfarin ár. Gjaldtaka á vinsælum ferðamannastöðum hefur verið deiluefni undanfarin ár og mál ratað fyrir dómstóla. 

Hæstiréttur komst að þeirri niðurstöðu að gjaldtaka á Geysissvæðinu væri óheimil en sá munur er á svæðinu og fyrrnefndum svæðum að hluti landsins er í eigu ríksins.

Göngustígar og pallar hafa verið lagðir og settir upp. Vísir/Vilhelm

Tengdar fréttir

Vill aukna gjaldtöku í ferðaþjónustu frekar en skattahækkun á greinina

Helga Árnadóttir, framkvæmdastjóri Samtaka ferðaþjónustunnar, vill að stjórnvöld hverfi frá fyrirætlunum sínum um að hækka virðisaukaskatt á ferðaþjónustufyrirtæki en haldi hins vegar áfram þeirri vinnu með atvinnugreininni að taka gjald fyrir virðisaukandi þjónustu, til dæmis bílastæðagjöld og salernisgjald, á ferðamannastöðum um landið.

Náttúrupassi óþarfur vegna skattahækkunar á ferðaþjónustu

Þórdís Kolbrún Reykfjörð Gylfadóttir, ferðamálaráðherra, segir að ekki sé ástæða til þess að endurnýta hugmyndina um náttúrupassa, meðal annars vegna þess að ríkisstjórnin hyggst færa ferðaþjónustuna í almennt þrep virðisaukaskatts.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.