Innlent

Mygla í tveimur nýuppgerðum stofum og skólanum lokað

Stefán Ó. Jónsson skrifar
Kársnesskóli í Kópavogi
Kársnesskóli í Kópavogi vísir/hörður

Kársnesskóla við Skólagerði, fyrir börn í 1. til 4. bekk, hefur öllum verið lokað eftir að mygla greindist í tveimur stofum í austurálmu byggingarinnar. Stofurnar voru gerðar upp fyrir ári síðan. Sérfræðingar frá verkfræðistofunni Eflu tóku sýni föstudaginn fyrir páska og gáfu þau til kynna að raka og myglu væri að finna í skólastofunum tveimur.

Verið er að setja upp kennslutöflu, skjávarpa og annan kennslubúnað í matsal vestast á skólalóðinni og gögn barnanna verða þrifin í dag og í byrjun næstu viku.

Þá munu hópur barna einnig hafast við í litlu húsi á skólalóðinni sem alla jafna er nýtt sem frístundaúrræði fyrir börn með sérþarfir í 5. til 10.bekk.

Þetta kemur fram í tölvupósti skólastjórans, Bjargar Baldursdóttur, til foreldra.

Þar segir hún að allt frá því skemmdir greindust fyrst í skólanum hafi verið haft að leiðarljósi að gera allt til „að forðast það að nemendur og starfsfólk okkar búi við umhverfi sem mögulega gæti verið heilsuspillandi.“

Björg segir það hafa komið flatt upp á starfsfólk skólans að mygla hafi leynst í austurálmunni - „þar sem stofurnar voru gerðar upp fyrir ári síðan.“

„Auðvitað koma svona flutningar alltaf til með að hafa einhver óþægindi í för með sér fyrir nemendur og kennara en reynsla okkar undanfarna mánuði segir okkur að nemendur, foreldrar og kennarar hafa sýnt þessum aðstæðum góðan skilning og allir hafa lagt sig fram um að láta sem allra minnst rask verða á skólastarfinu og gera þetta eins vel og hægt er,“ segir Björg í póstinum.




Fleiri fréttir

Sjá meira