Lífið

Aprílspá Siggu Kling – Vatnsberinn: Þú hefur þá snilligáfu að fá manneskjur til að segja þér allt

Elsku Vatnsberinn minn, ég get sagt það með hreinni samvisku að þetta er ár vatnsberans. Þetta tímabil mun svo sannarlega sýna úr hverju þú ert gerður. Þú færð svo djúpan skilning á því hvernig þú ætlar að leysa lífsgátuna þína.

Þessu svipar til þess að þú sért að lesa spennandi skáldsögu og endirinn sé miklu betri en þú hefur nokkurn tímann þorað að vona. Þú átt eftir að skilja hvað þú ert frábær félagsskapur, hvað þú ert fyndinn og svo hreinlega með þetta. Stundum áttu það til að fara aðeins yfir strikið, en þú munt alltaf komast upp með það sem þú segir með hreinskilni þinni því að þú ert bara svo skemmtilegur.

Fólk á svolítið eftir að liggja á trúnó með þér, og þú hefur þá snilligáfu að fá manneskjur sem eru lokaðar og treysta engum til að segja þér allt. Það má vel vera, að þegar þú varst yngri hafir þú verið svolítið feiminn, en þú ert algjörlega búinn að henda því. Lykillinn að velferð þinni á þeim tíma sem þú ert að fara inn í er að þú verður að læra hvenær þú átt að stoppa.

Kannski er hægt að líkja því við að þegar þú ert að landa fiski, þá dregurðu hann of hratt inn og getur misst bráðina. Stundum þarftu aðeins að stoppa með veiðistöngina, draga að landi, stoppa, draga að landi – þú þarft að vera svolítið slyngur í samningum og því sem þú vilt að gerist. Og elsku hjartað mitt, lífið er bara ástarævintýri og sérstaklega þegar þú átt í hlut.

Þú átt svo auðvelt með að heillast, og líka auðvelt með að detta úr því að vera ástfanginn. Það mikilvægasta fyrir þig hvort sem þú ert í sambandi eða á lausu er að velja þér ástargyðju eða goð sem er er skemmtilegt og ber þig á höndum sér.

Svo þarft þú bara að krydda ástina með salti og pipar og vera þakklátur fyrir hvað þú ert í raun heppinn í ástamálum. Ástin fyrir þig er eins og svartigaldur svo þú þarft að læra leikinn að vera stabíll í ástinni og sjá hvað mikið þú ert að græða á að hafa þessa manneskju í lífi þínu.
Mottó – Þú ert sá sem er valinn í landsliðið

Frægir Vatnsberar: Pacas hans Begga, Geir Sveinsson handknattleiksþjálfari, Halla himintungl, Clark Gable leikari, Sveinbjörg Birna Sveinbjörnsdóttir borgarfulltrúi, Yoko Ono, Bjarni Benediktsson, fjármála- og efnahagsráðherra, Katrín Jakobsdóttir þingkona, Hilmir Snær Guðnason leikari, Rikka sjónvarpskona, María Ólafsdóttir Júróvisjónstjarna, Þóra Arnórsdóttir, ritstjóri Kastljóss, Gunna Dís útvarpskona, Höddi Magg, Andrea Róberts mannauður, Hilmar Hafsteinsson ofurfasteignasali, Rut Roberts flugfreyja hjá Icelandair, Ragnheidur Guðfinna sálfræðingur




Fleiri fréttir

Sjá meira