Innlent

Sjallar á Seltjarnarnesi sakaðir um einræðistilburði

Jakob Bjarnar skrifar
Guðmundur Ari veltir því fyrir sér hvort hann þurfi yfirhöfuð að mæta á fund þegar niðurstaða hans er hvort sem er fyrirliggjandi. Ásgerður segir að um fullkomlega eðlileg vinnubrögð sé að ræða.
Guðmundur Ari veltir því fyrir sér hvort hann þurfi yfirhöfuð að mæta á fund þegar niðurstaða hans er hvort sem er fyrirliggjandi. Ásgerður segir að um fullkomlega eðlileg vinnubrögð sé að ræða.

Guðmundur Ari Sigurjónsson, bæjarfulltrúi fyrir Samfylkingu á Seltjarnarnesi, furðar sig á afgerandi vinnubrögðum meirihlutans. Með nýlegu fundarboði var send út fundargerð þar sem búið var að afgreiða öll mál og merkja við mætingu þeirra sem fundinn sátu. Það er áður en fundur var haldinn. Ásgerður Halldórsdóttir bæjarstjóri segir um fullkomlega eðlileg vinnubrögð að ræða.

Guðmundur Ari skrifaði færslu á Facebook-síðu sína í gærkvöldi þar sem hann veltir fyrir sér því hvernig það megi vera að hann hafi fengið senda fundargerð fundar sem hann átti eftir að sitja.

„Fullkomlega eðlileg vinnubrögðin alltaf hjá Sjálfstæðisflokknum á Seltjarnarnesi.
Flokkur með um 52% meirihluta sendir fulltrúum minnihlutans fundardagskrá fyrir fund bæjarráðs sem við eigum saman í fyrramálið þar sem búið er að afgreiða öll málin og hvernig unnið verður með þau áfram.
Spurning hvort það taki sig að mæta, búið að merkja við mætingu hjá mér og allt!“

Bæjarstjórinn á Seltjarnarnesi er afar röskur og til hagræðis er fundargerðin svo gott sem klár, áður en fundir fara fram.

Með birtir Guðmundur Ari mynd af fundargerðinni, en er reyndar búinn að skyggja hluta þess sem þar kemur fram. Ásgerður bæjarstjóri er undrandi á þessum athugasemdum frá Guðmundi Ara því fundurinn var í morgun og að sögn bæjarstjórans fóru þar fram góðar umræður. Og hún segir samskipti sín og Guðmundar ávallt hafa verið góð. Ásgerður segir þetta gert til að auðvelda, til undirbúnings og hagræðis; svo fundurinn megi ganga sem best.

„Bæjarstjóri undirbýr dagskrá gerir uppkast af fundargerð í hugsanlegri útfærslu og leggur fram. Flóknara er þetta ekki og svona hefur þetta alltaf verið,“ segir Ásgerður bæjarstjóri í samtali við Vísi. Og henni finnst þetta vart í frásögur færandi.




Fleiri fréttir

Sjá meira