Helena: Þarf hjálp við að fá systur mína yfir

Helena Sverrisdóttir, leikmaður Hauka, var útnefnd besti leikmaður Dominos-deildar kvenna í körfubolta í dag á lokahófi sambandsins sem fór fram í Ægisgarði úti á Granda.

Helena skoraði 24,4 stig að meðaltali í leik, tók 13,3 fráköst og gaf 6,8 stoðsendingar fyrir Haukaliðið sem endaði í öðru sæti eftir tap í oddaleik gegn Snæfelli.

Sjá einnig:Helena og Haukur Helgi best

„Maður þakkar alltaf fyrir svona verðlaun. Það er gaman að fá svona viðurkenningu en þetta er varla sárabót fyrir að missa af titlinum,“ sagði Helena við Vísi í dag.

Hvernig var þessi vetur fyrir hana? „Við fórum inn í þetta svolítið blint og reyndum að spila án Kana til að byrja með. Síðan fengum við Kana sem gekk alls ekki upp. Síðan endum við tímabilið Kanalausar og gengum í gegnum þjálfarabreytingar.“

„Þetta var svolítið upp og niður en ég held að liðið hafi lært mikið af þessu. Þetta fer í reynslubankann og hjálpar okkur í framhaldinu. Mér fannst þetta frábær vetur og það hefði verið stór plús að klára Íslandsmeistaratitilinn,“ sagði Helena.

Mikið gekk á hjá Haukunum í vetur en þetta er ekkert miðað við hvað Helena hefur upplifað á mörgum árum í háskóla í Bandaríkjunum og svo í atvinnumennsku í Austur-Evrópu.

„Svona er þetta bara. Deildin er orðin betri og umgjörðin meiri sem og umfjöllunin þannig þetta fylgir. Ég hef upplifað miklu meiri storm en þetta. Ég naut vetrarins mjög vel og þetta var mjög gaman þó sumir tímar hafi verið erfiðir,“ segir Helena, en fékk hún allt út úr vetrinum sem hún vildi persónulega?

„Mér fannst þetta líða svo hratt. Mér finnst ég enn nýkomin heim en nú er ég að fatta að það er komið ár síðan ég kom heim. Mig langaði að að koma heim því ég var með heimþrá og vildi hitta fjölskyldu og vini sem ég fékk að gera. Hvað varðar körfuboltann var svekkjandi að missa af bikarnum og Íslandsmeistaratitlinum. Við reynum bara aftur á næsta ári,“ sagði hún.

Eru atvinnudraumarnir úti? „Ég ætla ekkert að loka á það en á næsta ári langar mig að spila aftur í Haukum. Eftir það sjáum við bara til,“ sagði Helena, en verður systir hennar, Guðbjörg, leikmaður Vals, í liði með systur sinni á næstu leiktíð?

„Ég þarf eiginlega að fá hjálp frá öðrum til að rífa hana yfir. Það gengur ekki alveg nógu vel,“ sagði Helena Sverrisdóttir.

Allt viðtalið má sjá hér að ofan.