Innlent

Mengunarský yfir höfuðborgarsvæðinu

Birgir Olgeirsson skrifar
Mengunarskýið er sýnilegt Reykvíkingum ef þeir horfa í átt til Mosfellsbæjar en liggur yfir öllu höfuðborgarsvæðinu.
Mengunarskýið er sýnilegt Reykvíkingum ef þeir horfa í átt til Mosfellsbæjar en liggur yfir öllu höfuðborgarsvæðinu. Vísir/Anton Brink

„Þetta er fyrst og fremst vegna útblásturs frá bílum,“ segir Þorsteinn Jóhannsson, sérfræðingur í loftmengun, um mengunarský sem liggur nú yfir höfuðborgarsvæðinu.

Þeir sem staddir eru í Reykjavík sjá þetta ský greinilega ef þeir horfa í átt til Mosfellsbæjar en þeir sem eru í Mosfellsbæ sjá skýið ekki svo greinilega hjá sér, heldur þurfa þeir að horfa í átt til Reykjavíkur til að sjá það.

Mengunarskýið er vegna útblásturs frá bílum. Vísir/Anton Brink

Þorsteinn segir þetta stafa af sjónblekkingum sem þessi loftmengun skapar. „Reykvíkingum finnst hún vera yfir Mosfellsbæ en fólk í Mosfellsbæ horfir til Reykjavíkur og hugsar með sér að það sé rosaleg mengun í Reykjavík. Maður þarf að horfa ákveðna marga kílómetra í gegnum þetta til að sjá þetta,“ segir Þorsteinn.

Hann segir skýið liggja frá Reykjavík og til Mosfellsbæjar vegna vindáttarinnar en þessar aðstæður skapast í mjög hægum vindi. Nú er til að mynda suðvestan átt og vindur undir tveimur metrum á sekúndu.

Þorsteinn segir mengunargildin ekki há í dag en þetta ástand sé ekki skaðlegt heilsunni ef það varir svona í einn dag. Þeir sem eru með öndunarfærasjúkdóma gætu hins vegar fundið fyrir þessu. Hann segir loftmengunina yfir höfuðborgarsvæðinu í dag ekki í líkingu við þá sem er að finna á stærri svæðum úti í heimi þar sem er mikil bílaumferð. 



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira