Innlent

Nemendur mótmæla brottvísun

Kristjana Björg Guðbrandsdóttir skrifar
Ingvar Þór Björnsson og Óskar Steinn Ómarsson hjá Ungum jafnaðarmönnum í Hafnarfirði skipuleggja mótmæli með nemendum í Flensborg og vilja sýna samstöðu með Dega fjölskyldunni.
Ingvar Þór Björnsson og Óskar Steinn Ómarsson hjá Ungum jafnaðarmönnum í Hafnarfirði skipuleggja mótmæli með nemendum í Flensborg og vilja sýna samstöðu með Dega fjölskyldunni. Fréttablaðið/Ernir

Nemendafélag Flensborgarskólans og Ungir jafnaðarmenn í Hafnarfirði hafa boðað til samstöðufundar fyrir Dega fjölskylduna sem hefur verið vísað úr landi. Samstöðufundurinn verður haldinn á Thorsplani í Hafnarfirði á morgun sunnudag klukkan fjögur. Tæplega hundrað hafa boðað komu sína.

Formaður Ungra jafnaðarmanna í Hafnarfirði, Ingvar Þór Björnsson segir ótækt að vísa burtu fjölskyldu og börnum sem hafa aðlagast vel í bænum . „Ungliðahreyfingin styður nemendur í Flensborg. Það er svo ósanngjarnt að vísa þeim burt. Þau hafa aðlagast svo vel samfélaginu. Krakkarnir taka þátt í hafnfirsku skólastarfi og tómstundum og gengur vel í lífinu hér,“ segir hann.

Dega fjölskyldan höfðar nú einkamál á hendur ríkinu og berst fyrir dvalarleyfi á Íslandi. Þau komu hingað til lands í lok júlí á síðasta ári og sótti um hæli en var synjað. Elsti sonur hjónanna, Skënder og Nazmie Dega, glímir við alvarleg geðræn veikindi og hefur ekki fengið viðeigandi meðferð og lyf í heimalandinu. Yngri systkinin Joniada og Viken hafa staðið sig vel í námi og tómstundum. Skólameistari Flensborgarskóla þar sem Joniada stundar nám mótmælti ákvörðun kærunefndar og lýsti því hversu góður nemendi hún er. Þá hafa foreldrar barna í FH þar sem Viken hefur stundað íþróttir mótmælt meðferð barnanna sem til stendur að vísa úr landi.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira