Körfubolti

Fjórar systur á leið með landsliðinu til Ungverjalands

Óskar Ófeigur Jónsson. skrifar
Systurnar í landsliðinu. Frá vinstri: Helena Sverrisdóttir, Guðbjörg Sverrisdóttir, Berglind Gunnarsdóttir og Gunnhildur Gunnarsdóttir.
Systurnar í landsliðinu. Frá vinstri: Helena Sverrisdóttir, Guðbjörg Sverrisdóttir, Berglind Gunnarsdóttir og Gunnhildur Gunnarsdóttir. Fréttablaðið/Stefán

Íslenska kvennalandsliðið í körfubolta flaug í morgun út til Ungverjalands þar sem liðið mætir heimastúlkum á laugardaginn í fyrsta leik í undankeppni EM.

Ívar Ásgrímsson, þjálfari liðsins, valdi í gær þær tólf stelpur sem spila fyrsta Evrópuleik liðsins í sex ár. Það vekur vissulega athygli að fjórar systur eru í hópnum að þessu sinni. Það eru landsliðsfyrirliðinn Helena Sverrisdóttir og yngri systir hennar, Guðbjörg Sverrisdóttir. Helena sem er 27 ára spilar með Haukum en hin 23 ára gamla Guðbjörg er fyrirliði Valsliðsins. Þær unnu báðar Íslandsmeistaratitilinn með Haukum.

Hinar systurnar í tólf manna hópnum eru Gunnhildur Gunnarsdóttir og yngri systir hennar, Berglind Gunnarsdóttir, sem urðu saman Íslandsmeistarar með Snæfelli síðasta vor. Berglind, sem er 22 ára, er annar tveggja nýliða liðsins ásamt Bergþóru Holton Tómasdóttur en hin 25 ára gamla Gunnhildur hefur verið fastamaður í landsliðinu frá því að það var endurvakið árið 2012.

Helena og Guðbjörg léku sinn fyrsta landsleik saman í fyrra og hafa verið í landsliðinu í öllum sex leikjum liðsins á þessu ári. Þetta verða ekki fyrstu systurnar til þess að spila í Evrópuleik með íslenska kvennalandsliðinu en Sigrún Sjöfn og Guðrún Ósk Ámundadóttir léku saman í sex Evrópuleikj- um á árunum 2008 til 2009.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.