Körfubolti

Körfuboltakvöld á Stöð 2 Sport: Leikur í beinni og uppgjörsþáttur eftir hverja umferð

Tómas Þór Þórðarson skrifar
KR-ingar eiga titil að verja.
KR-ingar eiga titil að verja. vísir/anton

Stöð 2 Sport mun auka gífurlega umfjöllun sína um Dominos-deildirnar í körfubolta í vetur, en einn leikur verður í beinni útsendingu í hverri umferð bæði í Dominos-deild karla og kvenna.

Einnig verður nýr þáttur á dagskrá sem ber heitið Dominos-Körfuboltakvöld, en þar fara sérfræðingar yfir hverja umferð í Dominos-deild karla.

Fyrsti þátturinn verður á dagskrá 14. október, en þar verður hitað upp fyrir deildina. Fyrsta beina útsendingin verður svo 16. október þar sem bikarmeistarar Stjörnunnar taka á móti Íslandsmeisturum KR í Ásgarði.

Körfuboltakvöld verður á dagskrá eftir beinar útsendingar í Dominos-deild karla, en í þættinum verður sýnt frá öllum leikjunum, þar verða viðtöl við leikmenn og þjálfara eftir alla leiki og sérfræðingar þáttarins sjá um að greina allt það góða og allt það slæma.

Systurnar Helena og Guðbjörg Sverrisdóttir munu mætast í leikjum Hauka og Vals í vetur. vísir/anton

Helena komin heim
Fyrsta beina útsendingin frá Dominos-deild kvenna verður 14. október þar sem mætast spennandi nýliðar Stjörnunnar og Haukar með Helenu Sverrisdóttir nýkomna heim úr atvinnumennsku. Fimm leikir verða sýndir beint á fyrstu tveimur vikum deildarinnar.

Deildirnar hafur sjaldan ef aldrei verið jafn áhugaverðar, en beðið eftir tímabilinu með mikilli spennu hjá báðum kynjum.

Fimm leikmenn sem voru með íslenska landsliðinu á EM 2015 í Berlín spila í deildinni. Ægir Þór Steinarsson, KR, og Ragnar Nathanaelsson, Þór Þorlákshöfn, sneru báðir heim úr atvinnumennsku og krydda deildina. Fyrir voru Helgi Már Magnússon og Pavel Ermolinskij hjá KR og Logi Gunnarsson hjá Njarðvík.

Hjá konunum er auðvitað mesta spennan fyrir að sjá Helenu Sverrisdóttur, en þessi lang besta körfuboltakona landsins hefur verið flaggberi kvennakörfuboltans um margra ára bil. Hún mun lenda nokkrum sinnum í systraslag í vetur. Guðbjörg Sverrisdóttir, systir Helenu, er lykilmaður í liði Vals, en saman spila þær í landsliðinu.

Landsliðsmennirnir og EM-fararnir Helgi Már Magnússon, Pavel Ermolinskij, Ægir Þór Steinarsson, Ragnar Nathanaelsson og Logi Gunnarsson verða allir á skjánum í vetur. myndir/kkí

Teymið í Körfuboltakvöldi:
Umsjónarmaður körfuboltakvölds er Kjartan Atli Kjartansson, fyrrverandi leikmaður Stjörnunnar og fjölmiðlamaður.

Kjartan Atli varð bikarmeistari með Stjörnunni sem leikmaður árin 2009 og 2013 auk þess sem hann var aðstoðarþjálfari Stjörnunnar þegar það vann þriðja bikarmeistaratitilinn á sex árum í febrúar á þessu ári.

Sérfræðingarnar verða fjórir; Fannar Ólafsson, Hermann Hauksson, Kristinn Friðriksson og Jón Halldór Eðvaldsson.

Fannar Ólafsson var einn áhrifamesti leikmaður Dominos-deildarinnar í mörg ár, en hann leiddi KR til Íslandsmeistaratitils sem fyrirliði í þrígang; 2007, 2009 og 2011. Þá varð hann einnig Íslandsmeistari með Keflavík 1999 og 2004.

Kristinn Friðriksson er ein besta skytta í sögu íslensks körfubolta. Hann varð þrisvar sinnum Íslandsmeistari með Keflavík (1992, 1993 og 1997) auk þess sem hann hefur skrifað um körfubolta með miklum tilþrifum í Morgunblaðið undanfarin ár.

Hermann Hauksson var kosinn besti leikmaður efstu deildar af leikmönnum deildarinnar árið 1997 þegar hann spilaði með KR. Hermann varð bikarmeistari með Njarðvík árið 1999 og skoraði þá eftirminnilega þriggja stiga körfu sem kom leiknum í framlengingu.

Jón Halldór Eðvaldsson gerði Keflavík að Íslandsmeisturum í úrvalsdeild kvenna bæði 2008 og 2011. Þá var hann aðstoðarþjálfari karlaliðs Keflavíkur þegar liðið varð síðast bikarmeistari árið 2012.

Bikarmeistarar Stjörnunnar fá KR í heimsókn í fyrsta sjónvarpsleiknum. vísir/þórdís

Öflug byrjun
Körfuboltinn byrjar af krafti á Stöð 2 Sport um miðjan október. Þann 14. október verður bein útsending frá Dominos-deild kvenna og svo upphitunarþátturinn fyrir Dominos-deild karla.

Tveimur dögum síðar verður svo leikur Stjörnunnar og KR í Dominos-deild karla í beinni útsendingu og fyrsti uppgjörsþáttur Körfuboltakvölds í beinu framhaldi. Önnur umferðin klárast svo þremur dögum síðar og verður þá annar þáttur Körfuboltakvölds.

Þegar NBA-deildin hefst svo verður leikur í bestu deild heims á eftir hverjum þætti Körfuboltakvölds þannig áhugamenn um íþróttina geta eytt föstudagskvöldunum í sófanum frá 19.00 og fram á nótt.

Ekki láta Dominos-deildina og körfuboltakvöld framhjá þér fara í vetur. Pantaðu þér áskrift hér.

Körfuboltadagskráin á Stöð 2 Sport í október:
14.10 Stjarnan - Haukar DD KVK
14.10 Upphitunarþáttur Körfuboltakvölds
16.10 Stjarnan - KR og Dominos-Körfuboltakvöld
17.10 Grindavík - Valur DD KVK
19.10 Keflavík - Haukar og Dominos-Körfuboltakvöld
21.10 Haukar - Snæfell DD KVK
23.10 Njarðvík - Keflavík og Dominos-Körfuboltakvöld
24.10 Keflavík - Haukar DD KVK
30.10 KR - Njarðvík og Dominos-Körfuboltakvöld
31.10 Snæfell - Keflavík DD KVK
06.11 Höttur - KR og Körfuboltakvöld



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.