Körfubolti

Ægir Þór líklega á leið til KR

Tómas Þór Þórðarson skrifar
Ægir Þór Steinarsson í leik gegn Serbíu á EM.
Ægir Þór Steinarsson í leik gegn Serbíu á EM. vísir/valli

Ægir Þór Steinarsson, landsliðsmaður í körfubolta, spilar að öllum líkindum með KR í Dominos-deild karla í vetur.

Ægir Þór er samningslaus eftir að spila með Sundsvall Dragons í Svíþjóð á síðustu leiktíð, en hann fór með íslenska liðinu á EM fyrr í þessum mánuði.

„Þetta er allt í vinnslu. Ægir er mjög jákvæður og kominn ansi langt í þessu ferli með okkur í KR. Við vonumst eftir því að geta skrifað undir samning á næstu dögum,“ segir Böðvar Guðjónsson, formaður meistaraflokksráðs hjá KR, við Vísi.

„Það er ekkert fast í hendi auðvitað fyrr en búið er að skrifa undir, en við höfum verið í góðu sambandi við hann. Við yrðum gríðarlega ánægðir með að fá svona sómadreng eins og Ægir ern innan sem utan vallarn til okkar í KR,“ segir Böðvar.

Ægir Þór er uppalinn Fjölnismaður og spilaði síðasta með liðinu í Dominos-deildinni 2012. Hann spilaði síðast heila leiktíð veturinn 2010-2011 og skoraði þá 16 stig og gaf 8,9 stoðsendingar að meðaltali í leik.

KR liðið, sem hefur unnið Dominos-deildina undanfarin tvö keppnistímabil, verður ekki árennilegt með Ægi innan sinna raða. Í liðinu eru fyrir landsliðsmennirnir Pavel Ermolinskij, Helgi Már Magnússon og Brynjar Þór Björnsson.

KR er svo með aðra frábæra leikmenn á borð við Darra Hilmarsson og Bandaríkjamanninn Michael Craion auk ungra og efnilegra leikmann.

„Við setjum markið alltaf hátt í KR. Við erum heppnir að vera með þessa frábæru leikmenn en ekki má gleyma því að önnur lið í deildinni hafa líka styrkt sig. Við getum orðið meistarar þriðja árið í röð og það ætlum við að gera,“ segir Böðvar Guðjónsson.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.