Körfubolti

Margrét mætt á Smáþjóðaleika á ný eftir 24 ára fjarveru

Óskar Ófeigur Jónsson skrifar
Margrét Sturlaugsdóttir með stelpunum.
Margrét Sturlaugsdóttir með stelpunum. mynd/kkí.is

Það eru nú liðin 24 ár síðan að Margrét Sturlaugsdóttir tók síðast þátt í Smáþjóðaleikunum.

Margrét er aðstoðarþjálfari Ívars Ásgrímssonar alveg eins og í fyrrasumar en Margrét hefur einnig tekið við kvennaliði Keflavíkur og mun þjálfa liðið í Dominos-deildinni næsta vetur.

Margrét var með á bæði á Smáþjóðaleikunum á Kýpur 1989 og Smáþjóðaleikunum í Andorra 1991 en þetta var í tvö fyrstu skiptin sem íslenska kvennalandsliðið var með á Smáþjóðaleikunum.

Margrét vann silfur með liðinu á Kýpur 1989 og brons í Andorra tveimur árum síðar og getur nú vonandi fullkomnað safnið, það er með því að ná gullinu á leikunum í ár.

Margrét var aðeins önnur tveggja leikmanna sem spiluðu sex fyrstu leiki íslenska kvennalandsliðsins á Smáþjóðaleikum en hin var Anna María Sveinsdóttir.

Anna María Sveinsdóttir var einmitt aðstoðarþjálfari íslenska liðsins á Smáþjóðaleikunum í Lúxemborg fyrir tveimur árum.

Margrét skoraði 10 stig og tvær þriggja stiga körfur í þremur leikjum á Smáþjóðaleikunum á Kýpur 1989 og var síðan með 14 stig og eina þriggja stiga körfu Smáþjóðaleikunum í Andorra 1991.

Margrét skoraði tvær fyrstu þriggja stiga körfur íslenska kvennalandsliðsins á Smáþjóðaleikum sem komu báðar í sigurleik á móti Mónakó á Smáþjóðaleikunum á Kýpur 1989.  

Stelpurnar okkar spila við Möltu í kvöld kl. 19.30 og síðan við Mónakó á fimmtudeginum 4. júní (klukkan 17.00) og svo lokaleikinn sinn á móti Lúxemborg á laugardeginum 6. júní (klukkan 13.30).



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.