Lífið

Dimmblá á rauða dreglinum

Ragnheiður Tryggvadóttir skrifar
Heiðrún Ósk Sigfúsdóttir viðskiptafræðingur sá tækifæri í að hanna föt með myndum af íslenskri náttúru. 
mynd/Jónmundur Gíslason
Heiðrún Ósk Sigfúsdóttir viðskiptafræðingur sá tækifæri í að hanna föt með myndum af íslenskri náttúru. mynd/Jónmundur Gíslason

Heiðrún Ósk Sigfúsdóttir sendi frá sér sína fyrstu fatalínu rétt fyrir jól. Ný lína er þegar á teikniborðinu og klæddist Ilmur Kristjánsdóttir leikkona kjól úr þeirri línu á rauða dreglinum á Eddunni.

Ég hafði samband við Ilmi því mér finnst hún frábær leikkona. Hún var mjög spennt fyrir því að klæðast fatnaði frá mér á Eddunni og varð stórhrifin af kjólnum sem ég hannaði á hana,“ segir Heiðrún Ósk Sigfúsdóttir viðskiptafræðingur, en hún sendi frá sér sína fyrstu fatalínu rétt fyrir jól undir merkinu Dimmblá.

Ilmur Kristjánsdóttir leikkona klæddist kjólnum Skeiðarársandi úr væntanlegri línu frá Dimmblá á rauða dreglinum á Eddunni. Kjóllinn vakti athygli og segir Heiðrún spennandi tíma fram undan hjá fyrirtækinu. Eggert Jóhannesson

Kjóllinn sem Ilmur klæddist á rauða dreglinum er ekki enn kominn á markað en hann verður í nýrri línu sem er á teikniborðinu. Kjóllinn er úr hundrað prósent silki og á efnið er prentuð mynd af Skeiðarársandi en allar flíkur Heiðrúnar bera landslagsmyndir af íslenskri náttúru.

Norðurljós Fyrsta lína Heiðrúnar vakti athygli. Myndirnar á flíkunum tók Sigurður Hrafn Stefnisson af norðurljósum. Atli Már Hafsteinsson

En hvernig datt viðskiptafræðingi í hug að búa til föt?

„Ég er mikill náttúruunnandi og ferðast mikið um landið á hverju sumri. Íslensk náttúra er einstök og ég sá einfaldlega tækifæri í því að búa til spennandi fatalínu með myndum af íslenskri náttúru,“ útskýrir Heiðrún.

„Ég vinn með framúrskarandi ljósmyndurum. Fyrstu línuna kalla ég Norðurljósalínu og myndirnar sem ég nota eru eftir Sigurð Hrafn Stefnisson. Nýju línuna vinn ég með Ragnari Axelssyni ljósmyndara og mun hún meðal annars innihalda flíkur með myndum af Vatnajökli og Skeiðarársandi. Ég nota einungis vistvæn efni í flíkurnar, silki, lífræna bómull og efni, sem unnið er úr trjákvoðu,“ útskýrir Heiðrún.

Fyrsta línurnar innihalda kjóla og boli og fékk Norðurljósalínan strax góðar viðtökur. Heiðrún hefur meðal annars fengið óskir um að hanna flíkur á karlmenn og segir aldrei að vita nema það verði. Þá hefur síminn ekki stoppað eftir að Ilmur sást á rauða dreglinum.

„Fólk er sérstaklega hrifið af litunum í kjólnum,“ segir Heiðrún en verður leyndardómsfull þegar hún er innt eftir hvert framhaldið verði.

„Ég vil sem minnst gefa upp um það í bili en ég stefni að því að kynna Dimmblá á erlendum markaði. Það eru í það minnsta mjög spennandi tímar fram undan."



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.