Jón Baldvin í mál við Háskóla Íslands

Jón Baldvin Hannibalsson, fyrrverandi ráðherra, hefur ákveðið að fela lögmanni sínum að undirbúa málshöfðun á hendur Háskóla Íslands vegna ákvörðunarinnar um að afturkalla ráðningu hans til kennslu.

Í aðsendri grein á bls. 15 í Fréttablaðinu í dag segir Jón Baldvin skýringar forráðamanna Háskóla Íslands ekki standast skoðun. Þeir leyfi sér að ganga langt í að hagræða staðreyndum.

Jón Baldvin rekur aðdragandann að ákvörðun forráðamanna háskólans og segir meðal annars: „Það er mikill misskilningur, ef menn halda, að þetta snúist bara um mína persónu, eða um vítaverða stjórnunarhætti innan háskólans. Þetta mál snýst um grundvallarmannréttindi í réttarríki.“

Jón Baldvin, sem getur þess að hann hafi verið ráðinn gistiprófessor við Háskólann í Tartu í Eistlandi á næsta ári, segir enn fremur í greininni að með framgöngu sinni í málinu hafi forráðamenn háskólans í verki lagt blessun sína yfir dómstól götunnar.