Innlent

Hilmar Leifsson í meiðyrðamál við DV

Jón Júlíus Karlsson skrifar
Jón Trausti Reynisson og Reynir Traustason, ritstjórar DV.
Jón Trausti Reynisson og Reynir Traustason, ritstjórar DV. Mynd/Heiða Helgadóttir

Hilmar Þór Leifsson hefur stefnt ritstjórum DV, feðgunum Reyni Traustasyni og Jóni Trausta Reynissyni, fyrir dóm vegna meiðyrða. Hilmar stefnir vegnar fréttar sem birt var í DV helgina 3.-7. ágúst árið 2012 og bar yfirskriftina „Láglaunamenn í undirheimum“.

Í fréttinni er fullyrt að Hilmar Þór tengist eða hafi tengst glæpasamtökunum Hells Angels og hann sé félagi í samtökunum sem stundi skipulagða glæpastarfsemi. Þá segir í fréttinni að stefnandi sé háttsettur í stærstu glæpasamtökum heims. Í fréttinni segir síðan að mánaðarlaun opinberra meðlima í íslenskum undirheimasamtökum séu ekki há og því séu láglaunamenn í undirheimunum.

Stefnandi er nafngreindur í fréttinni og upplýst um að mánaðarlaun hans séu krónur 19.000,- á mánuði. Í stefnunni segir að fréttin verði ekki skilin öðruvísi en svo að framgreind mánaðarlaun stefnanda séu vegna starfa hans í undirheimunum.

Hilmar sendi bréf þann 10. september 2012 til DV þar sem vakin var athygli á því að ummæli sem væri að finna í fréttinni væru ærumeiðandi aðdróttanir. Var þess krafist að DV upplýsti hver bæri ábyrgð á fréttinni. Ekkert svar barst við framangreindu erindi né ítrekun þess og af þeirri ástæðu var höfðað mál.

Fyrirtaka fer fram í Héraðsdómi Reykjavíkur á mánudag.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira