Körfubolti

Gunnar rekinn frá KR

Eiríkur Stefán Ásgeirsson skrifar
Gunnar Sverrisson.
Gunnar Sverrisson. Mynd/Daníel
Gunnar Sverrisson, aðstoðarþjálfari körfuboltaliðs KR, var í dag látinn fara frá félaginu. Finnur Freyr Stefánsson, þjálfari kvennaliðs KR, mun taka við daglegri þjálfun liðsins.

Helgi Magnússon var í sumar ráðinn aðalþjálfari KR og hefur hann gegnt því starfi samhliða því að spila með liðinu.

Böðvar Guðjónsson, formaður körfuknattleiksdeildar KR, sagði í samtali við Vísi að Finnur Freyr muni nú taka við daglegri þjálfun liðsins og stjórnun í leikjum.

„Samstarf Helga og Gunnars gekk ekki upp því það eru ár og dagar síðan að KR hefur verið í svo slæmri stöðu í deildinni þegar þrjár umferðir eru eftir," sagði Böðvar en KR hefur unnið tíu leiki af nítján og er í sjötta sæti deildarinnar.

Finnur Freyr mun nú stýra daglegum æfingum ásamt Helga og stjórna svo leikjum liðsins. Helgi verður sem fyrr aðalþjálfari liðsins. „En í leikjunum þarf Helgi að einbeita sér 100 prósent að því að vera leikmaður liðsins," sagði Böðvar.

Hann segir það leiðinlegt að þurfa að skilja við Gunnar. „Hann er toppmaður en þetta var bara því miður ekki að ganga upp. Félagið er stærra en einstaklingurinn og stundum þarf að taka slíkar ákvarðanir."




Fleiri fréttir

Sjá meira


×