Innlent

Gleðitíðindi olíugeirans á nýju ári verða af Jan Mayen-svæðinu

Kristján Már Unnarsson skrifar

Norskir fjölmiðlar lýsa samningnum sem innsiglaður verður með Íslandsheimsókn olíumálaráðherra Noregs á morgun sem sögulegum viðburði. Einn kunnasti olíuráðgjafi Norðmanna spáir því í áramótapistli að ein gleðilegustu tíðindi olíugeirans á nýju ári verði af Jan Mayen-svæðinu.

Olíu- og orkumálaráðherra Noregs, Ola Borten Moe, er væntanlegur til Íslands síðdegis á morgun til að vera við athöfn í Ráðherrabústaðnum á föstudag þegar fyrstu olíuleitarleyfin á Drekasvæðinu verða formlega undirrituð en bæði Stórþingið og ríkisstjórn Noregs samþykktu fyrir jól þátttöku ríkisolíufélagsins Petoro í verkefninu.

Í Noregi hefur þessi aðild norska ríkisins og Íslandsferð olíumálaráðherrans þegar vakið athygli þarlendra fjölmiðla. Stærsta dagblaðið, Verdens Gang, sagði í fyrirsögn, undir mynd af ráðherranum á borpalli, að Noregur ætlaði að gera Ísland að olíuríki. Íslandi yrði hjálpað til að verða ríkt. Norskir fjölmiðlar lýsa þessu sem sögulegum olíusamningi við Ísland, með honum muni norska ríkið í fyrsta sinn taka þátt í olíuleit utan eigin lögsögu.

Einn helsti ráðgjafi og dálkahöfundur Noregs um olíugeirann, Hans Henrik Ramm, spáir því í áramótapistli, undir fyrirsögninni „Sjaldan leiðinlegur dagur í olíugeiranum", að meðal gleðilegustu tíðinda á nýju ári verði áætlun Olíustofnunar Noregs um verðmæti olíu- og gaslinda á Jan Mayen-svæðinu. Þótt sú áætlun verði háð mikilli óvissu verði engu að síður mjög spennandi að sjá á hvaða bili það auðlindamat muni liggja.

Þá segir Hans Henrik Ramm að norska ríkisstjórnin muni leggja frumvarp fyrir Stórþingið í vor um að Norðmenn opni fyrir olíuleit á sínum hluta Jan Mayen-svæðisins og spáir því að það verði samþykkt með miklum meirihluta. Hann telur þó að olíufélög muni fara rólega af stað og að þau muni fyrst vilja sjá hvað gerist í leitinni Íslandsmegin. Íslensku sérleyfin verði staðfest í byrjun ársins og síðan muni taka tíma að koma hljóðbylgjumælingum þar af stað.

Ramm hefur gegnt stöðu aðstoðarolíumálaráðherra Noregs, setið í borgarstjórn Oslóar og á Stórþinginu sem varaþingmaður, og verið pólitískur ráðgjafi fjármálaráðuneytis Noregs í olíumálum.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira