Skúli Mogensen: WOW mun sækja fram og er komið til að vera

„Við ætlum okkur að sækja fram, og efla okkar starfsemi enn frekar fyrir næsta sumar," segir Skúli Mogensen, stjórnarformaður og framkvæmdastjóri WOW air. Félag hans, Títan fjárfestingafélag, lagði WOW nýlega til viðbótar fjármagn, um 500 milljónir króna, til þess að styrkja stöðu félagsins og efla vöxt þess, að sögn Skúla.

Hann segir WOW ekki glíma við nein rekstrarvandræði og að nýlegar mannabreytingar, þegar Baldur Oddur Baldursson hætti sem framkvæmdastjóri og Skúli sjálfur tók við stjórnartaumunum, tengist ekki slíku. „Baldur óskaði eftir því að hætta störfum, bæði fyrir WOW og Títan, og því voru þessar breytingar gerðar. Ég hef sagt það sjálfur að WOW air sé komið til að vera, og það hefur ekkert breyst. Við ætlum okkur að sækja meira fram, og styrkja stöðu félagsins."

Aðspurður hvort verr hafi gengið hjá WOW en gert hafi verið ráð fyrir í áætlunum, segir Skúli að svo hafi ekki verið. Hins vegar hafi undirbúningur mátt vera meiri áður en farið var í loftið, enda sé margt tæknilega flókið sem við kemur flugrekstri. „Þetta hefur verið lærdómsríkur tími, svo ekki sé meira sagt, en okkur hefur samt gengið vel með flesta þætti. Þjónustunni hefur verið vel tekið, og stundvísin hefur verið góð og starfsfólkið staðið sig mjög vel. Á þessu er hægt að byggja og ná enn meiri árangri," segir Skúli.

Matthías Imsland, framkvæmdastjóri rekstrarsviðs WOW air, fór út úr stjórn félagsins fyrr í mánuðinum, en sæti hans í stjórninni tók Hörður Bender. Hörður er forstjóri og einn eigenda Folkia, smálánafyrirtækis sem starfar á Norðurlöndunum og í Eistlandi.

Sú stjórnarbreyting var gerð á þeirri forsendu að Matthías væri framkvæmdastjóri hjá fyrirtækinu og því ekki æskilegt að hann ætti einnig sæti í stjórninni.

Skúli segir, aðspurður um hvort hann muni þá einnig víkja úr stjórninni eins og Matthías þar sem hann er orðinn framkvæmdastjóri, að það muni gerast. „Það er samt ekki ákveðið hver tekur mitt sæti, eða hvenær það gerist."

Aðrir í stjórn félagsins, auk Skúla og Harðar, eru Björn Ingi Knútsson, Davíð Másson og Liv Bergþórsdóttir.