Stúka mun rísa á Ísafirði

Fulltrúar eignarhaldsfélagsins ST2012, Héraðssambands Vestfirðinga og Ísafjarðarbæjar hafa skrifað undir samning um eignarhald á fyrirhugaðri stúkubyggingu við Torfnesvöll, knattspyrnuvöll Ísafjarðarbæjar. Þetta kemur fram á fréttavefnum Bæjarins besta.

Karlalið BÍ/Bolungarvík leikur í 1. deild og gaf Knattspyrnusamband Íslands félaginu frest til 15. júlí til þess að byggja stúku og uppfylla þar með leyfiskerfi sambandsins. Ljóst er að stúkan verður ekki fullkláruð fyrir þann tíma en reiknað er með því að hún rísi í september.

Í samningnum er gert ráð fyrir að Ísafjarðarbær eignist mannvirkið þegar fyrsta áfanga lýkur. Í áfanganum á að steypa 540 sæta áhorfendastúku, 55,4 metra langa og 11,4 metra breiða. Ganga á frá stúkunni að utan og gera innra rými fokhelt. Skotíþróttafélag Ísafjarðarbæjar mun hafa aðstöðu í húsnæðinu.

Nánar um málið á vef Bæjarins besta, sjá hér.