Eva María Jónsdóttir í Eurovision

Eva María Jónsdóttir hefur gengið til liðs við hið árlega Eurovision-æði sem grípur þjóðina því hún mun verða kynnir Eurovision ásamt Ragnhildi Steinunni.

„Ég hef alltaf tekið þátt í þessu en bara heima hjá mér. Núna verður þetta bara í vinnunni,“ segir Eva María um kynnisstarf sitt í Euro­vision og viðurkennir fúslega að hún sé heilluð af þessari keppni sem margir telja nú ekki merkilega. „Eurovision er bara eitthvert furðulegt og fyndið sjónvarpsefni,“ útskýrir sjónvarpskonan.

Fyrsta kvöldið verður á laugardaginn en þá keppa fjögur lög um hylli áhorfenda heima í stofu. Meðal þeirra sem stíga á svið eru ungstirnið Jóhanna Guðrún, Edgar Smári og Idol-Heiða. Eva segist ekkert kvíða því að þurfa að hlusta á öll lögin og kastar glöð frá sér þeim forréttindum að geta slökkt á sjónvarpinu ef lagasmíðarnar reynast vera skelfilegar. „Og svo er það nú líka oft þannig að verstu atriðin eru oft eftirminnilegust.“

Ragnhildur Steinunn stjórnaði Eurovision-langlokunni í fyrra ásamt Gísla Einarssyni og vakti sjónvarpskonan mikla athygli fyrir oft á tíðum glæsilega og íburðarmikla kjóla. Eva leyfir sér að efast um að Eurovision-keppnin í ár verði einhver svipuð búningaveisla og þá. „Ég er búin með það tímabil í mínu lífi. Þetta verður meira um flytjendurna og dansarana enda er Eurovision-keppnin sjálf alveg nóg fyrir áhorfendurna.“freyrgigja@frettabladid.is