Tónlist

Hafdís Huld með lungnasýkingu

hafdís huld Þarf að hvíla röddina næstu tvær vikurnar.
hafdís huld Þarf að hvíla röddina næstu tvær vikurnar. MYND/Hörður

Tónlistarkonan Hafdís Huld Þrastardóttir hefur frestað tónleikaferð sinni um Bretland vegna lungnasýkingar. Hafdís átti að koma fram á fyrstu tónleikunum í Birmingham í fyrrakvöld en ekkert varð af þeim. Ráðlögðu læknar henni að hvíla sig næstu tvær vikurnar, því annars gæti hún skaðað röddina.

„Ég hélt ég myndi ná þessu úr mér með öllum þessum gömlu góðu aðferðum en eins og allir heyrðu á Íslensku tónlistarverðlaununum þá hljómaði ég eins og Louis Arm­strong,“ segir Hafdís Huld, sem er stödd heima hjá sér í London. „Ég ætlaði að syngja á þorrablóti hjá Íslendingafélaginu á laugardaginn síðasta en ég varð að hætta við það. Maður er þrjóskur Íslendingur og ég aflýsti ekki tónleikaferðalaginu fyrr en um miðjan sunnudaginn.“

Næstu tónleikar Hafdísar eru fyrirhugaðir í París þann 24. febrúar, ef heilsan leyfir. Eftir það mun hún spila á tvennum tónleikum í Barcelona og Madrid í byrjun mars. Síðar í mánuðinum er svo fyrirhuguð tónleikaferð um Norðurlönd, þar á meðal Ísland.

Hafdís getur þó glaðst yfir því að hafa fengið Íslensku tónlistarverðlaunin fyrir bestu poppplötuna. „Það var yndislegt og ég átti engan veginn von á þessu. Ég hef ekkert getað spilað heima ennþá og mér fannst bara heiður að vera tilnefnd og fá að vera með. Það var algjör draumur að fá verðlaun fyrir bestu plötuna,“ segir Hafdís.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.