deNos og Palli bóndi berast á banaspjótum

„Þetta er úrslitaleikurinn í haustdeild Tuddans, sem er Íslandsmeistaramótið í tölvuleikjum. Bæði lið hafa lagt mikla vinnu síðastliðna þrjá mánuði við að koma sér á þennan stað, og þetta er uppskera þess erfiðis, hvort liðið endar á að vera Íslandsmeistari á laugardaginn,“ segir Ólafur Nils Sigurðsson, sérlegur sérfræðingur Vísis í Counter-Strike Global Offensive eða bara CS.

Nú stendur mikið til, og veruleg eftirvænting er ríkjandi innan CS-samfélagsins. Úrslitaleikur Íslandsmótsins í Counter-Strike.  „Já ég hugsa að nánast allir muni fylgjast með því hver verður meistari á laugardaginn,“ segir Ólafur Nils: „Leikirnir munu fara fram í Tölvulistanum á næstkomandi laugardag, League of Legends keppnin hefst á hádegi, og Counter-Strike hefst 15.00, við hvetjum fólk til þess að koma á staðinn og hvetja sína menn.“

Þeir gömlu gegn þeim hinum yngri

Vísir mun streyma leiknum – hægt verður að fylgjast með leiknum í beinni útsendingu á Vísi. En, hvaða lið eru þetta sem eru að fara að eigast við og hvað má um þau segja?

„Annað liðið, SeveN, er skipað leikmönnum sem að flestir kepptu í leiknum fyrir mörgum árum en fóru svo í pásu, en með auknum vinsældum leiksins nýverið þá snéru þeir aftur. Þeir hafa komið flestum á óvart með örum bætingum og hafa stimplað sig inn sem topplið á landinu á síðastliðnum mánuði. Liðið er skipað leikmönnum sem hafa gríðarlega reynslu og hafa meira að segja keppt erlendis við góðan orðstýr,“ útskýrir Ólafur Nils.

Og það er ekki laust við að blaðamaðurinn, sem er gamall í hettunni, sé þá þegar búinn að ákveða með hverjum hann ætlar að halda. Eða hvað?

„Mótherjar þeirra eru Malefiq.Tölvutek, sem er skipað yngri leikmönnum, hluti af þeim hefur þó töluverða reynslu, og tveir af lykilmönnum íslenska landsliðsins eru í því, þar af besti leikmaður landsins, Páll Sindri Einarsson. Þannig að það mætti segja að í leiknum mætist tvær kynslóðir leikmanna og það verður gríðarlega áhugavert að sjá hver ber sigur úr býtum.“

Þetta er því athyglisvert. Þessir gömlu eru ekki eins reyndir og þeir sem yngri eru.

Heilinn gegn hinum snara

Vísir fylgdist grannt með gangi mála fyrir um mánuði þegar Ísland var næstum því komið í úrslit HM í Counter-Strike. Aðeins einn leikmaður SeveN var í landsliðshópnum, enda hefur liðið tekið gríðarlegum framförum á stuttum tíma, að sögn Ólafs. Fjórir af fimm leikmönnum Malefiq voru hinsvegar í landsliðshópnum, og tveir voru í liðinu sem að lék alla leiki í undankeppni heimsmeistaramótsins.

En, með hvaða leikmönnum ættu áhorfendur einkum að hafa á góðar gætur?

„Ég myndi fylgjast vel með Brynjari Páli 'deNos' Jóhannssyni hjá SeveN, en hann er bæði heili liðsins og einn öflugasti leikmaður þeirra. Í liði Malefiq er það landsliðsmaðurinn Páll Sindri 'pallib0ndi' Einarsson sem er ein helsta vonarstjarna Íslands og sennilegasta besti leikmaðurinn á landinu.“

Ólafur Nils hvetur alla sem vettlingi geta valdið að mæta í Tölvulistann, þar sem viðureignin fer fram og hann lofar góðri stemmningu.