Lífið

Dansandi draumabirnir kvikmyndaðir á Íslandi

Von er á um fjörutíu samkynhneigðum björnum til landsins í september á uppákomuna Bears on Ice.
Von er á um fjörutíu samkynhneigðum björnum til landsins í september á uppákomuna Bears on Ice.
Uppákoman Bears on Ice sem haldin verður 8. til 11. september næstkomandi er stíluð inn á svokallaða birni eða „bears“. Það er heiti á samkynhneigðum körlum sem eltast ekki við staðalímynd hommans og eru oftar en ekki þybbnir, sköllóttir og með skegg. Sumsé sannir karlmenn. „Von er á mönnum frá löndum á borð við Bretland, Þýskaland, Kanada, Frakkland og Bandaríkin, líklega í kringum fjörutíu til fimmtíu talsins,“ segir Ísar Logi Arnarsson, sem er einn þeirra sem standa að uppákomunni.

Þetta verður í sjöunda sinn sem Bears on Ice er haldin en í þetta sinn munu áhugaverðir gestir fylgja hópnum. „Breskur sjónvarpsframleiðandi og leikstjóri, Jonathan Robinson, mun mynda viðburðinn en hann hefur myndað samkomur hinna svokölluðu bjarna um allan heim, en kemur nú til Íslands í fyrsta sinn,“ segir Ísar en með Robinson kemur all sérstæður skemmtiflokkur.

„Hann kallast The Dreambears og er skipaður þremur þéttum og bangsalegum mönnum sem syngja og dansa og munu skemmta hópnum hér á landi,“ segir Ísar glaðlega en sjálfur mun hann þeyta skífum í partíum sem haldin verða fyrir hópinn sem kemur hingað til lands.

Þó að skemmtanalífið sé vissulega aðdráttarafl munu mennirnir þó einnig upplifa náttúru landsins. „Þeir fara í Bláa lónið, gullna hringinn og jafnvel í hvalaskoðun,“ upplýsir Ísar og segir fyrri hópa ávallt hafa skemmt sér vel.

Sambærilegar uppákomur eru haldnar víða um lönd og eru oft mjög umfangsmiklar. „Til dæmis er haldin risastór hátíð í Barcelona á hverju ári og þá fyllist borgin af hamingjusömum böngsum,“ segir Ísar. Hér á landi hefur hátíðin hins vegar verið smá í sniðum.

„Það hefur verið stefnan að halda þessu smáu enda kynnast menn mun betur þannig,“ segir hann.Ísar bendir á vefsíðuna www.gayice.is fyrir þá sem vilja kynna sér þennan viðburð nánar.

solveig@frettabladid.is






Fleiri fréttir

Sjá meira


×