Búist við kjötskorti

Komi til verkfalls dýralækna næsta mánudag gæti orðið kjötskortur í verslunum innan fárra daga.

Finnur Árnason, forstjóri Haga, segir erfitt að segja nákvæmlega til um áhrif verkfalls á verslanir.

„Kjötið klárast tiltölulega hratt, en ég veit að einhverjir eru að sækja um undanþágur þannig að á þessari stundu er ekki víst hvernig þetta endar,“ segir hann. Vari verkfallið í skamman tíma segir hann einhver áhrif verða, en ekki mikil. Vari það hins vegar lengi verði áhrifin mikil.

„Við fáum ferskvöru daglega,“ segir Finnur og telur líklegt að hún klárist á tveimur til þremur dögum í verkfalli. „Síðan eru einhverjar meiri birgðir af frosinni vöru.“

Þá komi verkfall dýralækna mismunandi niður á kjöttegundum.

„Það er ekki sláturtíð í lambakjöti svo að birgðastaða þess er bara birgðastaðan í landinu og þarf ekki dýralækna til að klára söluna á því, þannig að það myndi líklega duga okkur fram á haust.“

Áhrifin komi hins vegar strax fram í því að skrúfist fyrir framboð á svína-, kjúklinga- og nautakjöti.

Í tilkynningu sem Guðbjörg Þorvarðardóttir, formaður Dýralæknafélags Íslands, sendi frá sér í gær kemur fram að flestir dýralæknar í opinberri þjónustu starfi hjá Matvælastofnun og að komi til verkfalls raskist starfsemi stofnunarinnar töluvert. 

Hún bendir á að komi til verkfalls frá og með næsta mánudegi, 20. apríl, líkt og boðað hefur verið stöðvast slátrun í landinu, dýralæknar votti ekki flutning þar sem þarf og ábendingum um brot á velferð dýra verði ekki sinnt. Þá stöðvist útflutningur dýraafurða til ríkja utan Evrópska efnahagssvæðisins og hætt verði útgáfu vottorða vegna útflutnings gæludýra.

Eins verði ekki gefin út vottorð vegna flutnings tækja eða skepna yfir sjúkdómavarnalínur.

Áhrif verkfalls dýralækna

• Allt eftirlit í frumframleiðslu og með matvælafyrirtækjum sem framleiða matvæli úr dýraafurðum stöðvast.
• Eftirlit með aðbúnaði dýra stöðvast.
• Innflutningur á fóðri sem inniheldur dýraafurðir frá ríkjum utan EES stöðvast.
• Allt eftirlit í sláturhúsum stöðvast.
• Innflutningur á lifandi dýrum og dýraafurðum stöðvast.
• Útflutningur á lifandi dýrum stöðvast.
• Útflutningur á dýraafurðum til þriðju ríkja stöðvast að mestu.
• Eftirlit með sjúkdómum í fiskeldi stöðvast.
• Ýmis önnur eftirlitsverkefni stöðvast.
• Þjónusta við eftirlitsaðila, leiðbeiningar o.fl. hættir.
• Fyrirspurnum fyrirtækja og almennings varðandi ofangreind atriði verður ekki sinnt.