Björgunin gekk vel miðað við aðstæður

Björgun á manni sem lenti í sjálfheldu við fossinn Míganda í Gunnólfsvíkurfjalli gekk vel miðað við aðstæður og er maðurinn hólpinn. Hann var kominn niður af fjallinu og í bíl um klukkan hálf sex í morgun. Þá hafði hann verið í sjálfheldu í um 15 klukkustundir. Björgunarsveitarmenn þurftu að síga niður að manninum og fylgja honum niður af fjallinu.

Samkvæmt upplýsingum frá Lögreglunni á Húsavík var maðurinn í nokkuð góðu ástandi og bar sig þokkalega.

Maðurinn hafði verið að leita að kindum þegar hann lenti í sjálfheldu, en samkvæmt RÚV var hann með tvo hunda með sér sem veittu honum félagsskap og héldu á honum hita.

Aðstæður voru leitarmönnum erfiðar á svæðinu og myrkur einnig. Tveir bátar voru fengnir til að lýsa fjallið upp af sjónum á meðan björgunarmenn athöfnuðu sig í fjallinu.

Þyrla landhelgisgæslunnar kom að björguninni en ekki var hægt að nota hana til að bjarga manninum. Alls komu um 80 manns að aðgerðunum.