Innlent

Biður um leyfi fyrir farþegalest í Reykjavíkurhöfn

Garðar Örn Úlfarsson skrifar
Lestin þjónaði um stutt skeið í Viðey og gengur kannski í endurnýjun lífdaga í landi.
Lestin þjónaði um stutt skeið í Viðey og gengur kannski í endurnýjun lífdaga í landi. Mynd/Eysteinn Þ. Yngvason
Stjórn Faxaflóahafna segist jákvæð gagnvart tilraunarekstri á fimmtíu manna farþegalest við gömlu höfnina í Reykjavík.

„Telja má mjög líklegt að lestin myndi skapa skemmtilega stemningu á svæðinu enda hentar hún fyrir alla aldurshópa. Jafnframt gæti hún stóraukið aðsókn að sjóminjasafninu Víkinni og ýmsum öðrum þjónustufyrirtækjum á Grandagarði,“ segir í leyfisumsókn Eysteins Þ. Yngvasonar.

Að sögn Eysteins keypti hann lestina á sínum tíma þegar hann var með Viðeyjarferjuna sem hann rak til ársins 2008.

„Lestin fékk gríðarlega góðar viðtökur og aðsóknin í bátinn jókst stórum, sérstaklega frá fjölskyldum og eldra fólki sem átti erfitt með gang og fannst frábært að fá svona ferð um eyjuna. En ég var ekki búinn að nota lestina nema nokkrar helgar þegar þetta var boðið út og annar tók við ferjurekstrinum svo ég tók lestina bara og setti í geymslu,“ segir Eysteinn.

Í umsókn Eysteins kemur fram að aka eigi nánast á gönguhraða um Suðurbugt, upp Ægisgarð, gegn um slippsvæðið, niður Hlésgötu, út Rastargötu og stoppað við sjóminjasafnið.

„Ég er búinn að finna fína leið. Við erum að fara að hittast, við hafnarstjóri, til að athuga hvort það séu einhver ljón í veginum fyrir því að hægt sé að koma þessu gang,“ segir Eysteinn sem kveðst munu geta hafið lestarferðirnar innan tveggja vikna frá því leyfi er veitt.

Gert er ráð fyrir að ekið verði á klukkustundar fresti frá Miðbakka að Grandagarði eða jafnvel oftar gefist það betur að sögn Eysteins.

„Þetta gæti verið skemmtileg viðbót á hafnarsvæðinu. Fólk gæti tekið lestina út á Granda og gengið til baka eða bara farið báðar leiðir með apparatinu,“ segir lestarstjórinn tilvonandi sem er þessa dagana að leggja lokahönd á standsetningu lestarinnar og vonast til að hún verði farin að líða eftir hafnarbakkanum um næstu mánaðamót.




Fleiri fréttir

Sjá meira


×