Bakgrunnur starfsmanna kirkjunnar verður skoðaður

Allir starfsmenn þjóðkirkjunnar þurfa nú að skrifa undir plagg þar sem þeir gefa leyfi til að sakaferill þeirra og bakgrunnur verði skoðaður. Biskup Íslands segir nauðsynlegt að hafa svona fyrirkomulag á stofnunum og öllum stöðum þar sem börn og unglingar koma við sögu.

Eftir miklar umræður um kynferðisbrot innan þjóðkirkjunnar var samþykkt á kirkjuþingi árið 2009 að starfsmenn hjá þjóðkirkjunni þyrftu að gefa heimild með undirrituðu samþykki svo hægt væri að kanna bakgrunn og sakaskrá viðkomandi. Í fyrra var þetta tekið enn lengra.

„Fyrst var þetta hugsað með fasta starfsmenn, presta og starfsmenn í barna- og æskulýðsstarfi en síðan hefur þetta útfærst, þannig að í sjálfu sér er hverri sóknarnefnd í sjálfsvald sett hversu langt hún gengur og allir þeir sem koma inn fyrir kirkjunnar dyr þó þau séu bara að vaska upp í eldhúsinu eða eitthvað slíkt. að þeir skrifi undir svona samþykki," segir Agnes M. Sigurðardóttir, biskup.

Þetta á einnig við þá starfsmenn og sjálfboðaliða sem hófu störf hjá þjóðkirkjunni fyrir 2009. Þá er athugað í sakaskrá hvort viðkomandi hafi brotið barnaverndar- eða hegningarlög, gerst sekur um ofbeldis eða kynferðisbrot og svo framvegis. En undirritað samþykki viðkomandi starfsmanns er skilyrði.

„Markmiðið er náttúrulega að tryggja að við getum stundað fagleg og örugg vinnubrögð innan kirkjunnar. Og þar sem þetta var fyrst aðeins gagnvart börnum og unglingum þá eru þau náttúrulega það sem við þurfum mest að vanda okkur með í lífinu og starfið með þeim en þetta getur líka átt við um aðra starfsmenn þannig að nú gildir þetta um alla," segir hún.

„Ég held það sé nauðsynlegt að það sé svona fyrirkomulag í öllum stofnunum og á stöðum þar sem börn eru annars vegar þá gefi starfsfólk og þeir sem starfa með börnum, sjálfboðaliðar og aðrir leyfi fyrir því að þau sé skimuð,"