Bakari á verkamannalaunum lagði bakarí

Hæstiréttur dæmdi í gær Bakstur og veislu ehf, sem rekur bakaríið Vinaminni í Vestmannaeyjum, til að greiða fyrrverandi starfsmanni bakarísins rúmlega tvær milljónir króna. Um er að ræða mismun á launum starfsmannsins sem fékk greidd verkamannalaun en taldi sig eiga að fá laun sem menntaður bakari. Héraðsdómur hafði áður sýknað bakaríið en Hæstiréttur féllst á kröfu starfsmannsins.

Maðurinn, sem er með sveinspróf í bakaraiðn, hóf störf í bakaríinu í Vestmannaeyjum í maí 2012 og starfaði í rúmt ár. Eftir að ágreiningur kom upp um þau laun sem hann átti að fá varð samkomulag um að hann myndi ljúka störfum eftir Þjóðhátíð 2013. Hann hætti þó viku fyrr en samið hafði verið um.

Forsvarsmenn bakarísins sögðu manninn hafa verið ráðinn til almennra verkamannastarfa. Enginn ráðningasamningur var hins vegar gerður við starfsmanninn eins og skylt er. Á launaseðlum var tilgreint að hann starfaði sem bakari. Taldi Hæstiréttur að bakaríið yrði að bera hallan af sönnun um efni ráðningarsamningsins þar sem hann hefði ekki verið gerður.

Þegar litið væri til menntunar starfsmannsins, tilgreiningar á launaseðli um starf bakara og að forsvarsmönnum bakarísins hefði ekki tekist fyrir dómi að útlista með trúverðugum hætti þann grundvallarmun sem væri á sviði bakara annars vegar aðstoðarmanna þeirra hins vegar hefði bakaríinu ekki tekist að sanna að starfsmaðurinn hefði verið ráðinn til almennra verkamannastarfa. Þurfti bakaríið því að greiða starfsmanninum launakröfuna og 1,2 milljónir í málskostnað í héraði og fyrir Hæstarétti.

Dóminn í heild má lesa hér.