Jökulsá í miklum ham - Öskjuleið ófær

Öskjuleið er ófær eftir að Jökulsá á Fjöllum rauf varnargarð við Herðubreiðarlindir í gærmorgun. Óvíst er að vegurinn opnist á ný þetta sumar. Hálendisfulltrúi Vatnajökulsþjóðgarðs segir að áin hafi verið óvenju vatnsmikil í sumar og telur skýringuna þá að askan úr Eyjafjallajökli valdi meiri snjóbráðnun á jöklum.

Öskjuleið, hálendisvegur númer F88, er fjölfarnasta leiðin inn í Herðubreiðarlindir, Öskju og Kverkfjöll. Hún liggur meðfram vesturbakka Jökulsár á Fjöllum frá hringveginum á Mývatnsöræfum við Hrossaborg.

Vegurinn rofnaði í gærmorgun milli Lindaár og Strýtu, en svo nefnist skáli landvarða í Herðubreiðarlindum. Jökulsá rauf 40 til 50 metra breitt skarð í varnargarð, sem upphaflega var gerður fyrir sex árum, en hafði verið styrktur í vor, þar sem menn óttuðust að svona gæti farið, enda hefur áin verið að breyta sér þarna á svæðinu á undanförnum árum. Að sögn Jóhönnu Katrínar Þórhallsdóttur, hálendisfulltrúa Vatnajökulsþjóðgarðs, er vegurinn nú kolófær öllum bílum og óvíst hvenær hann opnast á ný.

Hátt í tvöhundruð ferðamenn á svæðinu eru þó ekki innilokaðir því þeir geta komist austur yfir Jökulsá við Upptyppinga og síðan yfir þverána Kreppu og þaðan til Möðrudals, en sú leið telst þokkaleg. Leiðir til vesturs, Dyngjufjallaleið og Gæsavatnaleið, eru mun verri og seinfarnari, og raunar varasamar þessa dagana vegna vatnavaxta, sérstaklega Gæsavatnaleið. Um tíu ferðamenn gistu í Herðubreiðarlindum í nótt, um eitthundrað gistu við Drekagil í Öskju og um fimmtíu manns voru í Kverkfjöllum, að sögn skálavarða.

Jóhanna Katrín segir Jökulsá á Fjöllum hafa verið óvenju vatnsmikla í sumar og rekur hún það til öskunnar úr Eyjafjallajökli, sem valdi meiri snjóbráðnun á Dyngjujökli og Brúarjökli, skriðjöklum Vatnajökuls til norðurs.

Gunnar Bóasson hjá Vegagerðinni á Húsavík segir Jökulsá nú í miklum ham og meðan svo sé þýði ekkert að reyna að opna veginn en málið verði þó skoðað þegar sljákki í ánni. Landvörður á svæðinu telur óvíst að vegurinn opnist aftur þetta sumarið.