Ferðaþjónustan lítur ummæli Ólafs Ragnars alvarlegum augum

„Þetta er auðvitað grafalvarlegt mál," segir Erna Hauksdóttir, framkvæmdastjóri Samtaka ferðaþjónustunnar um viðtal sem birtist við Ólaf Ragnar Grímsson, forseta Íslands, í Newsnight í breska ríkissjónvarpinu (BBC) í gær.

Þar sagði Ólafur Ragnar að gosið í Eyjafjallajökli væri lítið annað en létt æfing fyrir Kötlugosið. Hann bætti svo við að það væri ekki spurning hvort Katla myndi gjósa, heldur hvenær. Þá sagði Ólafur Ragnar að það væri kominn tími til þess að flugfélög í Evrópu og yfirvöld undirbyggju sig fyrir Kötlugosið sem yrði gríðarlegt hamfaragos.

Ummæli Ólafs Ragnars hafa farið víða en þau eru meðal annars höfð eftir honum í áströlskum fjölmiðlum auk þess sem ummælin hans fóru eins og eldur í sinu um fréttaveitur út um allan heim.

„Þetta er ekki nógu gott," segir Erna en fjölmargir ferðamenn hafa afboðað komu sína hingað til lands, bæði vegna flugsamgangna auk þess sem margir telja að það sé hreinlega ekki óhætt að vera hér á landi. Og eðlilega því erlendir fjölmiðlar sýna lítið annað en eldspúandi öskugos og myrkur að degi til í Mýrdalnum. Og svo lýsir forsetinn því yfir að umheimurinn hafi ekki séð neitt ennþá.

„En við verðum að vera bjartsýn fyrir næsta sumar," segir Erna en Samtök ferðaþjónustunnar auk fjölmargra opinberra aðila hafa farið í átak við að upplýsa Evrópubúa og fleiri um að hér sé allt í lagi að vera. Þrátt fyrir gríðarlega nálægð við hamfarir sem hafa lamað nær hálfa Evrópu í marga daga.

Það stefndi í metferðamannasumar en nú er það í uppnámi. Sjálf segist Erna líta jákvæðum augum til framtíðar. Gosið er að minnka og flugsamgöngur eru að komast í lag. Og með samhentu átaki vonast Erna til þess að bjarga ferðamannasumrinu.