Piltarnir tveir sem slógust í myndbandi sem Vísir sagði frá í gær gáfu sig fram til lögreglunnar í gær í fylgd feðra sinna. Þar útskýrðu þeir myndbandið þannig að þeir hefðu sett það á svið sér til gamans. Barnaverndarnefnd og skólayfirvöld í Keflavík hafa tekið á málinu að sögn lögreglunnar á Suðurnesjum.
Vísir greindi frá því í gær að gróft og niðurlægjandi myndskeið mætti finna á vefsíðunni Youtube af íslenskum unglingum að misþyrma öðrum pilt. Myndbandið var tekið út af vefnum eftir að fréttin birtist.
Myndbandið var hljóðskreytt með tónlist líkt og um eðlilegt afþreyingaefni væri að ræða en á því mátti sjá einn ungling ganga í skrokk á öðrum pilti. Allt í kring var hópur unglinga sem fylgdist með aðförinni sem virtist bæði gróf og niðurlægjandi. Í einu broti myndskeiðsins mátti sjá þriðja piltinn blanda sér inn í áflogin og slá fórnalambið bylmingshögg í andlitið.
Að lokum náði annar unglingurinn að snúa hinn niður og lét svo höggin dynja linnulaust á honum. Síðan reif hann drenginn upp, eins og sést á myndum hér við hliðina á, og hélt áfram að slá hann ítrekað í andlitið.
Eftir að frétt Vísis birtist um málið var myndbandið tekið út af Youtube-vefnum. Í kjölfarið hófs rannsókn lögreglunnar í Keflavík á málinu. Síðar gáfu piltarnir, sem eru fimmtán ára gamlir, sig fram til lögreglunnar og gáfu þær skýringar að atvikið hefði verið sett upp, eins og það var orðað.
Að sögn lögreglunnar voru drengirnir heldur lúpulegir yfir atvikinu en myndskeiðið var tekið upp síðasta haust.
Skólayfirvöld tóku málið í sínar hendur sem og barnaverndaryfirvöld í Reykjanesbæ. Ekki þótti ástæða til þess að rannsaka málið frekar af hálfu lögreglunnar.
