Semur Sign-plötu á íslensku

Ragnar Sólberg heldur áfram að semja tónlist fyrir Sign þó að bróðir hans sé hættur í sveitinni. Hann nýtur þess að vinna að tónlist í Svíþjóð.

„Platan verður á íslensku. Hún er að verða svo góð að ég er að spá í að gera hana á ensku líka,“ segir tónlistarmaðurinn Ragnar Sólberg um fyrstu drög að nýrri plötu hljómsveitarinnar Sign.

Ragnar dvelur nú í Svíþjóð ásamt fjölskyldu sinni og vinnur að ýmsum tónlistarverkefnum. Fréttablaðið fjallaði á dögunum um brotthvarf Egils Rafnssonar, bróður Ragnars, úr hljómsveitinni, eftir að Ragnar neitaði að skrifa undir samning við þýskt útgáfufyrirtæki.

„Okkur var boðinn samningur sem ég vildi ekki skrifa undir og það var svolítið mikið mál fyrir aðra sem hafa lagt mikla vinnu í hljómsveitina,“ segir Ragnar. „Í kjölfarið hættu Egill og Gísli [umboðsmaður]. Ég og Arnar [gítarleikari] ákváðum að fara bara aftur í grundvallaratriðin; semja plötu saman í rólegheitunum og hafa hana á íslensku.“

Ragnar segist hafa séð hlutina í nýju ljósi eftir moldviðrið og ákveðið í kjölfarið að hafa plötuna á íslensku. „Ég gerði mér grein fyrir því að mig langaði ekki að hella mér alveg hundrað prósent út í þetta og vera alltaf með annan fótinn í einhverri skítarútu,“ segir hann. „Þá fattaði ég hvað það var sem fékk mig til að byrja á þessu í byrjun.

Það er ekkert nema gleðin af því að gera tónlist. Einhvers staðar á leiðinni missti ég sjónar á því og þetta fór að snúast um allt annað en það.“

Sænski trommarinn Jon Skäre hleypur í skarð Egils í Sign, en hann er æskuvinur Sóleyjar, unnustu Ragnars, og trommar í nokkrum reggí- og þungarokkhljómsveitum í Svíþjóð.

Ragnar var einnig að klára plötu ásamt Ómari Emilssyni, æskufélaga sínum úr Hafnarfirði. Þeir kalla hljómsveitina RÓ og stefna á að gefa plötuna út fyrir jól.

„Við erum búnir að vinna í þessari plötu í fjögur ár, með rosalega löngum pásum inni á milli,“ segir hann. „Ég spila á hljóðfærin og svo syngjum við saman. Hann syngur meira en ég og þetta er acoustic-tónlist, en alls ekki auðmelt.“

Auglýsing sem Ragnar kom fram í fyrir Vodafone í Þýskalandi vakti athygli á dögunum. Ragnar syngur David Bowie-slagarann Heroes í auglýsingunni og var lagið gefið út í vefverslunum þar í landi. „Ég fór til Þýskalands og tók lagið upp með fínum pródúsentum sem hafa unnið að söluhæstu plötum Þýskalands og svona,“ segir Ragnar. „Samningurinn var bara upp á þetta lag og ef það gengur rosalega vel geri ég plötu í Þýskalandi í kjölfarið. Ég er hvorki að bíða né vonast eftir því.“

atlifannar@frettabladid.is