Óheppileg auglýsingamennska í Alabama

Tveimur yfirmönnum sjónvarpsstöðvar í Alabama hefur verið sagt upp störfum eftir heldur óheppilega framsetningu á auglýsingaskilti.

Flennistór auglýsing frá WPMI-sjónvarpsstöðinni, sem reyndar tilheyrir NBC-sjónvarpsrisanum bandaríska, birtist á auglýsingaskilti við þjóðveg í Mobile í Alabama fyrir fáeinum dögum. Um er að ræða tvískipt skilti þar sem öðru megin er auglýsingapláss en á hinum helmingnum rúlla helstu fréttafyrirsagnir af samskiptamiðlinum Twitter.

Á meðan auglýsingin frá WPMI sýndi stærðarinnar myndir af andlitum tveggja annáluðustu fréttaþulanna og vinsælasta veðurfræðings stöðvarinnar sló Twitter því upp með stríðsfyrirsögn á hinum helmingnum að þrír aðilar hefðu verið ákærðir fyrir hópnauðgun í Monroeville. Í augum þeirra vegfarenda sem þutu fram hjá í bílum sínum leit málið í meira lagi grunsamlega út enda engu líkara en að myndin af þrenningunni fylgdi fréttafyrirsögninni af Twitter.

Athugull vegfarandi náði að smella mynd af skiltinu um leið og hann ók hjá og ekki leið á löngu uns Netið logaði af kjaftagangi með tilheyrandi myndasendingum. Málið þykir hrein skelfing fyrir WPMI-stöðina og hefur tveimur yfirmönnum þar, sem ku bera ábyrgð á birtingu auglýsingarinnar, verið gert að taka poka sína.