Herra heilbrigði gripinn með hasspípu

Sundkappinn Michael Phelps sló flestum öðrum við á Ólympíuleikunum í Peking í sumar. Hann er fjórtánfaldur Ólympíugullverðlaunahafi og sumir myndu segja táknmynd heilbrigðarinnar og mikil fyrirmynd. Breska götublaðið News of the World birtir hinsvegar mynd af Phelps í dag þar sem hann sést reykja hasspípu.

„Þetta er furðuleg ljósmynd sem gæti eyðilagt feril stórkostlegasta keppanda í sögu Ólympíuleikanna," segir blaðð í grein sinni en myndin er síðan í nóvember á síðasta ári.

„Á myndinni má sjá Michael Phelps sem vann átta gullverðlaun á Ólympíuleikunum í Peking síðasta sumar, fá sér smók úr glerpípu. Pípur sem þessar eru yfirleitt notaðar til þess að reykja kannabis," segir ennfremur.

Samkvæmt frétt blaðsins voru nýlega kynnt lög sem setja menn í fjögurra ára keppnisbann fyrir að nota eiturlyf. Það þýðir að draumur Phelps um að bæta við Ólympíugullin fjórtán á næstu leikum í London árið 2012 gæti verið úti.

Samkvæmt fréttinni er myndin tekin eftir tveggja daga partýhald Phelps og félaga í nóvember þegar lítið er að gerast hjá sundmönnum og litlar líkur á því að menn séu teknir í lyfjapróf.