Mezzoforte afþakkar tónleikaboð frá Ísrael

Hljómsveitin Mezzoforte fékk boð um að spila á tónleikahátíð í Ísrael seinna á árinu. Eyþór Gunnarsson hljómborðsleikari sveitarinnar segir aldrei neitt annað hafa komið til greina en að afþakka boðið vegna hernaðaraðgerða Ísraela undanfarið. Hann segir Mezzofortemenn þó vera nokkuð bjartsýna á árið 2009 en sveitin hefur spilað á 20-50 tónleikum á ári undanfarið.

„Við erum með umboðsskrifstofu í Þýskalandi og þetta boð kom í gegnum hana. Við spurðum nú ekkert nánar út í hvað þetta væri þar sem það kom aldrei til greina að þiggja boðið," segir Eyþór.

Hann segir hljómsveitina nú vera að vinna að því að fylla inn í tónleikadagsrká ársins og þegar eru staðfestir einhverjir fimm til sex tónleikar.

„Þungmiðjan hefur samt verið seinna á árinu svona í október, nóvember. Við erum þegar komnir með tónleika í Þýsklandi og Rússlandi og það er meira á döfinni."

Eyþór segist ekki kvíða tónleikaþurrð en sveitin hefur verið að spila á 20-50 tónleikum á ári undanfarin ár eins og fyrr segir.

„Þetta hefur verið svona misjafnst frá ári til árs en við erum frekar bjartsýnir með þetta ár ef eitthvað er."