Aldrei eins nauðsynlegt og nú að meta afleiðingar stórra ákvarðana

Færa má rök fyrir því að aldrei hafi verið eins nauðsynlegt og við núverandi efnahagsaðstæður að meta gaumgæfilega allar afleiðingar stórra ákvarðana, til að mynda á sviði orkunýtingar og þungaiðnaðar. Þetta segir Þórunn Sveinbjarnardóttir umhverfisráðherra í skýrslu um umhverfismál sem lögð hefur verið fram á Alþingi.

Þetta er í fyrsta sinn sem umhverfisráðherra kynnir slíka skýrslu en í henni er bent á að vægi umhverfismála hafi aukist mikið á liðnum árum. Með skýrslunni sé ætlunin að upplýsa Alþingi um starfið í umhverfisráðuneytinu og stefnumótun í málaflokknum.

Ráðherra bendir á að samkvæmt stjórnarsáttmálanum einsetji ríkisstjórnin sér að Ísland verði í fararbroddi þjóða í umhverfismálum og láti til sín taka í baráttu gegn mengun og sóun náttúruauðlinda. Sérstök áhersla sé lögð á að ná víðtækri sátt meðal landsmanna um verndun verðmætra náttúrusvæða og í því augnamiði sé unnið að rannsóknum á verndargildi einstakra svæða.

Umhverfisráðherra bendir enn fremur á að hér á landi hafi verið mikil og hröð uppbygging á sviði orkunýtingar og þungaiðnaðar sem hafi haft mikil áhrif á umhverfi og samfélag. Núverandi efnahagslægð sé að hluta til afleiðing af ofþenslu á liðnum árum.

Við núverandi efnahagsaðstæður heyrist hins vegar raddir um að slaka þurfi á kröfum um umhverfisvernd og góða grundun ákvarðana um framkvæmdir. „Þvert á móti má færa fyrir því rök að aldrei hafi verið eins nauðsynlegt að meta gaumgæfilega allar líklegar afleiðingar stórra ákvarðana eins og nú," segir ráðherra. Hægt sé að byggja upp blómlegt samfélag án þess að fórna sérstæðum náttúruperlum og víðernum sem vart sé lengur að finna í öðrum ríkjum í vestanverðri Evrópu.